Къарт атам ауруб, джанына джетиб, сандыракъ этед,
Бир кёзюуде уа эсин джыяд да осият этед,
Осиятларын хар бир туудугъу кесича сюзед,
Хар ким болумгъа, акъылгъа кёре бирер зат «юзед».

Джууаб бералмайд, акъырын айтсакъ, АППА-деб, атын,
Къайгъы кемире, биз къуу-щуу болуб сакълайбыз къатын.
Ныгъышда АНЫ къатына чёгюб сабийлигимде,
Таурухларына тынгылагъаным тохтайд эсимде.

Юретиученед джети атагъа дери санаргъа,
«Хасауканы» да, «Ачемезни» да уста джырларгъа.
Бюгюн АППАНЫ къалмагъанд аллай юретир кючю...
Тёз, танг бир атса, себеб табарса, Аллахынг ючюн!

Макъа джюрюшлю, къадыр къылыкълы, хей, къутсуз заман,
Ышанмакълыгъымы, къазакъ бёрюча, талайса джаман!
Мутхуз джанады мени ангымда умут чырагъым,
Кемсиз сакълайма тангны атарын, кюнню чыгъарын.

1982 дж.