Къобан белляу айта, къалкъый барад Хурзук,
Башын салыб Шхайтыны тобугъуна,
Бир кёзюуде шимал джелчик болад бузукъ,
Юй джанында тал терекни шошлугъуна.

Джелчик чайкъай тереземи джабыуларын,
Сакъланмагъан къонакъ кибик ётед тёрге,
Меииге айта дунияны джарсыуларын,
Джукъуму да кирпиклерин сылайд ёрге.

Сагъышымда болгъан кибик кюз артында...
Мен кёреме къарт анамы, ауруб джатад,
Халын сора, олтурама мен къатында,
Мен кёрмейме, эшиклени биреу ачад.

«Джашым, ёрге тур!» — деб анням айтханында,
Турдум, кёрдюм, ол — тенгими къарт анасы...
Безги таууш эте, эшик къайтханында,
Ахыр кере эшитдим аннямы ауазын.

1982 дж.