Къазанланы Алийди
Кърым Семенланы чабыр киерге юретген,
Кесини къарт анасын
Кърым Семенлагъа сюйретген.
Кърым Семенлары
Азнаур къабакъгъа келдиле,
Ала анда Азнаургъа
Ханса, бийсе демедиле.
Азнаур къабакъны ала
Къазсыз, тауукъсуз этдиле,
Къазанланы къызбайны
Сауутсуз-сабасыз этдиле.
Кърым Семенлары андан
Ачемез къабакъгъа келдиле,
Бу элде ханнга бир кечеге
Кимни къатыны ариуду дедиле.
Ачемезни къатыны ариу Боюнчакъ
Бургъан чачлы, джумушакъ сёзлю,
Къара къашлы, дугъум кёзлю,
Татлы тилли ариу Боюнчакъ,
Къара шилли, мамукъдан джумушакъ.
Ачемезге Кърым хан келечи салгъанды,
Ол келечи салыб джигит Ачемезге баргъанды.
— Мени хан келечиге санга ийгенди,
Юйюнден дженгил кетсин дегенди,
Ариу Боюнчакъны хан излейди.
— Излей эсе, патчах бла хан бирди,
Башха болмай къатын бла джан бирди.
Ханны къатыным бла хатерин кёрелмем,
Джаным саулай къатынымы берелмем.
Ол джууаб бла ханны келечиси къайтханды,
Ханнга барыб бу хапарны айтханды.
— Итден туугъан Ачемез алай джигит эсе,
Атасындан къалгъан къой сюрюую къайдады?
— Хан къочхар башы, къой башы неге санайды,
Хан алай джигит хан эсе,
Алгъын туугъан тюнгюч уланы къайдады?
Алай айтханлай хан секириб тургъанды,
Сермеб алыб, сауутларын такъгъанды.
— Итден туугъан ит Ачемез, мында эсенг
Бери чыкъ деб, эшиклени къакъгъанды.
Ачемезни ариу къатынчыгъы Боюнчакъ
Эшиклени ачыб анга къарагъанды.
— Къурманынг болайым, аурууунгу алайым,
Ачемез юйден кетгенди, къорагъанды,
Тийрем, хоншум сёзчюдюле, джатма къой,
Джарыкъ айны бир кесек батма къой,
Эски ичиргилерибизни къакъма къой.
Хан къайтыб кетди кёзюуге дери эшикге,
Ачемез садагъын салыб турду тешикге.
Хан келиб тёше-мёшеге олтургъанды,
Ариу Боюнчакъ ханны чарыкъларын тартханды.
Джигит Ачемез садагъын чардакъдан атханды,
Акъ орунну къызыл къандан толтургъанды,
Ханны ёлюсюн эшик артына атханды.
Эртден бла ханны ёлюсюн салдыла чанагъа,
Джандетлени джети эшиги бош болсун
Ачемезни бизге табхан анагъа.
Ханны кёк кийизге чырмаб ийдиле,
Къатынына, ариу бийчеге саугъагъа.
Мени джауум къарасын ол кюн
Кёнделенде болгъан къаугъагъа.