Келгенлени джоллары мамукъдан,
Джашаулары болсун зауукъдан.
Къууанчыбыз кюнде да былай болсун,
Бу къууанчха келген насыбдан толсун.
Насыб халкъдан кетмесин,
Къыйынлыкъ анга джетмесин.
Келгенлени джашаулары мамыр болсун,
Аджаллары сабыр болсун.
Джашау болсун бирликде,
Болайыкъ бир-бирни сюймекликде.
Джарысынла джюрекле,
Тюз болсунла иннетле,
Къабыл болсунла ашхы тилекле.
Тюз иннет джашасын,
Зарны кюе ашасын.
Ашхыладан юлгю алайыкъ,
Аманладан кенг къалайыкъ.
Стауатла маллы болсунла,
Батманла баллы болсунла.
Эгиз-згиз тёлю туусун,
Сегиз-сегиз насыб джаусун.
Къозламагъан тиши къалмасын,
Джанлы къагъанакъ алмасын.
Джауумлу болсун джазыбыз,
Мал болсун азыгъыбыз.
Семиз болсунла малла,
Бек битсинле сабанла,
Башларына къол джетмезча,
Тюбю бла джылан ётмезча.
Ол насыбны биз тилейбиз,
Алгъыш аякъ къолубузда,
Уча сый да аллыбызда.
Джангы келинни намысыды,
Келин юйню насыбыды.
Келген келин къутлу болсун,
Кёб джёнесин, джуртлу болсун.
Келген келинни аягъындан,
Джылыу урсун джаягъындан.
Сюйюм берсин кёзлери,
Ийнакъ болсун сёзлери
Ышара-кюле келсин,
Этер ишин биле келсин.
Къартха-къуртха бачхыч болсун,
Ол джашаугъа ачхыч болсун.
Джарыкъ берсин джулдузча,
Джылтырасын къундузча.
Бек джабышсын эри бла,
Эт болгъанча тери бла.
Таза болсун тургъан юйю,
Джылтыраб ёссюн юйюрю.
Этер ишин терк толтурсун,
Абсынлагъа юлгю болсун.
Хар ким да аны ариу кёрсюн.
Тейри берсин ол насыбны,
Берир деб да умутубузд.
Ал табханы таякъчы,
Ызы бла табсын таракъчы.
Таякъчы таякъ тутсун.
Таракъчы таракъ тутсун.
Акъыллары тюз болсун,
Ёмюрлери джюз болсун.
Ишге юренсин къоллары,
Халкъ бла болсун джоллары,
Ашхыладан юлгю алсынла,
Аманладан кенг къалсынла.
Ашхылыкъгъа чабсынла,
Насыбны кёб табсынла.
Табыучу болсун эгизлени,
Джашы джексин ёгюзлени,
Къызы урсун кийизлени.
Аллах берсин ёгюзню тартханын,
Атны чабханын,
Шкокну атханын,
Къойну тюклюсюн,
Ийнекни сютлюсюн.
Алгъышчы алгъыш этсин,
Тынгылагъан амин десин,
Сыйлы аллах къабыл этсин.
Бу юйден алгъыш кетмесин,
Къаргъыш бу юйге джетмесин.
Дуниябыз мамыр болсун,
Рысхыбыз къалын болсун,
Сюйгенлерибиз сюерча,
Сюймегенлерибиз кюерча.
Тобукъларын тюерча,
Аякълары абынырча,
Джюреклери джарылырча.
Джазыбыз джауумлу болсун,
Кюзюбюз кюнлю болсун,
Къышыбыз къарлы болсун,
Халкъыбыз маллы болсун,
Хар затыбыз барлы болсун,
Къабырыбыз нюрлю болсун,
Къартларыбыз акъыл, иш юретсинле,
Джашла, къызла да аны этсинле.
Урунуб джашайыкъ,
Халал къыйын ашайыкъ.
Бир-бирибизге болушайыкъ,
Аллах сюйгенледен болайыкъ.
Боза аякъны алайыкъ,
Джарыкъ бетден къарайыкъ.
Бу суу бал чёбню башыды,
Таулуну джарыкъ ашыды.
Уллуду бу аякъны хурмети,
Джарыкъ болсун муну зтгенни беги.
Бу къыз бла джашны тоюду,
Джангы юйдегини оюнуду,
Емюрлери узакъ болсун.
Бир-бирлерин бек сюйсюнле,
Халал джашаугъа эс ийсинле.
Насыблы ишге алчы болсунла,
Келген джаугъа ачы болсунла.
Къууанчлыкъ юслеринде барсын,
Алгъыш аякъны да акъсакъал алсын.
Алгъышчы алгъыш этсин,
Файгъамбар амин десин,
Аллах къабыл этсин.
Бу боза баргъан джерге ауруу бармасын!