Тейри онгарсын,
Тейри джалбарсын,
Онг атландырсын,
Онг джюрютсюн,
Игиликни бери этсин.
Аманлыкъны кери этсин,
Кесибиз сюйген кибик
Тейри этсин.
Келген келин насыблы болсун,
Ырызлы болсун,
Бутун буруб олтурсун,
Бутлай урчукъ толтурсун.
Ышара келсин,
Кюле келсин,
Этер ишин
Биле келсин,
Келген джерин сюе келсин.
Эм алгъын таракъчы табсын,
Ызы бла таякъчы табсын.
Къойну тюклюсюн берсин,
Ийнекни сютлюсюн берсин,
Егюзню кючлюсюн берсин,
Атны джюрюгюн берсин.
Алгъыш кетмесин,
Къаргъыш джетмесин,
Аманла айтханча болмасын,
Игиле айтхандан къалмасын.
Бизни сюймегенни юйю дауур болсун,
Миннген аты джауур болсун.
Сюйгенибиз сюйюнсюн,
Акълы-кёклю кийинсин.
Сюймегенле ичлеринден кюйсюнле,
Тобукъларын тюйсюнле.
Алгъыш къабыл болсун,
Дуния мамыр болсун,
Терен болсун,
Таммий-кёл кибик,
Кёкден джаугъан джауум кибик,
Джерден чыкъгъан кырдык кибик,
Кесилген къурманлыкъны тюгю кибик.
Эшикге чыгъыб джамчы ургъан,
Атха миниб, къамчи ургъан
Балалары болсунла!
Токъ санлы толу аякъ,
Къолубузгъа алайыкъ,
Тилибизге салайыкъ,
Ичине къарайыкъ.
Къуругъан чёбню башыды,
Къарт таулуну ашыды.
Бу бозады, бозады,
Ашхы киши муну ичерге базады.
Ач къарыины токъ этген,
Аманлыкъны джокъ этген,
Бек битсинле сабанла,
Ашамасынла аманла.
Башларына къаргъыш джетмесин,
Тюблеринден джылан ётмесин.
Бу эки адамны кеслери сюйгеи кибик
Тейри этсин.
Этген муратларын табсынла,
Бир-бирин джаратсынла,
Бу суу бла мюрзеу
Бир-бирине джарашхан кибик
Алай джарашсынла,
Алгъышчыла алгъыш этсинле,
Аминчиле амин десинле.
Амин деген тилегин табсын,
Амин демеген тилин къабсын.