Тынгылагъыз, айтайым
Кёкге чыкъгъан сафарын.
Эсигизде тутугъуз
Файгъамбарны хапарын.

Бир баш кече Меккада
Кесим жукълап тургъанлай,
Мен элгенип уяндым,
Жабырайыл къычыргъанлай.

Чыкъдым эшик аллына,
Къайгъы этип, къоркъаракъ.
Кёрдюм эшик аллында –
Жер салынып бир боракъ.

Кёрдюм – аны жанында
Ёре туруп бир мёлек.
Айтды манга. «Я Расул,
Къабыл болду хар тилек».

Бийик эди къадырдан,
Атдан бираз гитчерек,
Нюр жаухардан къуралып
Юсюндеги ат керек.

«Мин атынга, я Расул,
Биз атланып кетейик.
Инша-Аллах, бюгече
Жети кёкден ётейик».

Миндим, анга тутдуруп,
Аякъларын алдырып,
Кёз жетмеген жерлеге
Атламларын салдырып.

Биз ёрлесек тик ёрге –
Узун болуп арт жаны,
Тигелесек баш эншге –
Бийик болуп ал жаны.

Бир сагъатны ичинде
Биз Къуддусха жетишдик.
Файгъамбарла келдиле,
Салам-келям этишдик.

Файгъамбарла барысы
Мени ийманнга салдыла,
Эки рекят намазны
Мени бла къылдыла.

Андан чыгъып, боракъны
Бир тогъайгъа байладыкъ.
Андан ёрге экибиз
Жыяулукъну сайладыкъ.

Мигирашха чыгъып, биз
Жети кёкден ётгенде,
Жети кёкден къутулуп,
Ситиратха жетгенде.

Айтды манга Жабырайыл:
«Мындан ары баралмам,
Изми болмай мен барсам,
Ачымайын къалалмам».

Жабырайылгъа мен айтдым:
«Энди къалай этейим?
Танымагъан жериме
Кесим къалай кетейим?»

Биз ол сёзде тургъанлай,
Бир жашил раф-раф жетди,
Андан ары ол манга
Ариу нёгерлик этди.

Жашил раф-раф бла мен
Кёк жабыудан ётгенбиз.
Кёк жабыудан къутулуп,
Къутусугъа жетгенбиз.

Биз жетгинчи, Уллу Аллах
Хар айтырын арз этди,
Юмметиме ол мени
Элли намаз фарыз этди.

Myca бла кенгешип,
Хар ишими тындырдым.
Къайтып барып тиледим,
Беш намазгъа жыйдырдым.

Къайтып келип Къуддусха,
Ала бла кёрюшдюм.
Жатхан жерим сууумай,
Мен Меккагъа жеришдим.

Тынч чыгъарын сюйсегиз,
Ёле туруп жаныгъыз –
Маулют этип, сиз Анга
Салауатла салыгъыз.

Къыямат кюн сиз Аны
Шафагъатын алыгъыз,
Жаханимни отундан
Узакъ болуп къалыгъыз.

Маула я салли уа саллим,
Даиман абада
Гъала хабака хабибика
Хайрилхалкъ и куллихим...

Маула я салли уа саллим
Даиман абада
Гъала хибибика
Хайрилхалкъ и куллихим.

Сыйлы сюйген къулуна
Рахмат этсин Уллу Аллах.
Ахлу-асхапларына
Ыразы болсун бир Аллах.

Mayлют этген адамла,
Биз тилейбиз, я Аллах,
Муну жазгъан адамны
Гюнахларын кеч, Аллах!

Биз жыйылгъан къулланы
Жаннет ахлу эт, Аллах!
Амин, амин, я Аллах!
Амин, амин, я Аллах!

Адам – адам болургъа
Динни жарыгъы керек.
Хатерлиге, игиге
Ачылсын жаннет эшик.

Дин къардашла, ахлула,
Бирден болургъа керек.
Файгъамбарны саламын
Бирден сорургъа керек.

Файгъамбарны туугъанын,
Кёкге учханын санадым.
Аны ёлген хапарын
Айталырмы къаламым?..