Ой эртденбла тогъуз сагъатда
Мен машинагъа миннгенме,
Сиз сау къалыгъыз, анам, эгечим,
Мен герман бойгъа киргенме.

Мен герман бойгъа кириб барама,
Сиз сау къалыгъыз, саламат,
Орамда къалгъан джангыз эгешчигим
Ой анам, сеннге аманат.

Мени анам кёлек бичгенди,
Тигилмей къалгъанед дженглери,
Бу тарыгъыуну айтдыргъан сизге
Джанымдан сюйген тенглерим.

Ой эртден бла чыгъара келдиле,
Меннге пулемётну къурдула,
Эки джарадан ёллюк болмазем,
Мени тогъуз кере урдула.

Мен Германияны таш орамларын
Къызыл къаным бла толтурдум,
Кёзлерим кёрмей кюнню джарыгъын
Джарты джанлы болуб мен турдум.

Ой сау къалыгъыз, эгечим, анам,
Мен ёлюб кетиб барама,
Джанымдан эсе сюйген тауланы
Кёрелмей ёлюб къалама.

Салам айтыгъыз мени джуртума,
Джамагъатыма, элиме,
Мен къанымы да, ой джанымы да,
Аямай бердим джериме.