Тарыгъыуларымы мен айтыр эдим
Субай санларымы юсюнден,
Субай санларымы джаугъа алдырдым
Ит фашистлени кючюнден.

Эртдембла тогъуз сагъатда
Биз машингъа миннгенбиз.
Ой сау къалыгъыз, анам, эгечим,
Биз къазауатха киргенбиз.

Украинада къалгъанды, анам,
Мени санларымы джартысы,
Юсюме ёре туруб турадыла
Ит фашистлени алтысы.

Ит фашистлени къараб кёргенлей,
Пулемётну къызыу атама.
Тогъуз джеримден джаралы болуб
Мен госпиталда джатама.

Ит фашистлени аллында туруб,
Мен пулемётуму атама
Апрель айда джаралы болуб,
Сизге термилиб джазама.

Джанымдан сюйген Азрет къарнашым,
Кийимлерими кийсенг а,
Мени къанымы ит фашистледен
Сен алмай къойма ёлсенг да.

Къайры джайыла болурла, анам,
Мени кютюучю малларым,
Украинада къабырда джаталла
Анам, сен ёсдюрген санларым.