Не къан джаугъанды Нарсана орамлагъа,
Анда адам къанла уа къайнайла,
Сиз да таныучу субай санларымы
Герман автоматла чайнайла.

Не айтырыкъларын биз да билмейбиз,
Очередь этиб тизелле,
Сиз да таныучу субай санларымы
Герман пулемётла юзелле.

Елюб къалама, къалай къыйынды,
Бу да худжу тюрме уа саулукъгъа,
Мени хапарымы айтыб барырсыз
Атамы эгечи Къалмукъгъа.

Тюрмеден къарасам кёзюм къарайды
Адамла джюрюучю юйлеге,
Къаллай аман кюнде тюшюб къалгъанма
Фашистле къолунда тюрмеге.

Тюрмени эшигин ачхан заманда
Бир сауут тюшмейди къолума.
Ит фашистле чулгъаныб джаталла
Мени къачарыкъ джолума.

Сиз да таныучу субай санларымы
Тюрмени да джуууб къаны агъад,
Артымда къалгъан мени ёксюзлерим
Совет властха аманат.

Артымда уа къалгъан мени да джангызым,
Мени да къанымы уа къурутмаз,
Совет властны да джаны сау болса,
Ол дертни дженгил унутмаз.

Бюгюн меннге джетген ачы къыйынлыкъны,
Ий, атам-анам, сормагъыз,
Артымда къалгъан сабий къарнашларым,
Мени да къанымы къоймагъыз.

Властны тебиннген тамам кюнюнде,
Киши келелмейди къатына,
Дунияны башын «аллыкъ» Германия
Къачыб а барады артына.