Ой аманла, тынгылагъыз Апсатыны кюуюне.
Биз барабыз чомарт байны юйюне.
Ой аманла, эртден бла эртде туругъуз,
Аджаллыгъа сауут-саба къуругъуз.
Джугъутурла эндиртгин кюн аллына быкъыгъа,
«Орайда» эте, биз джыйымдыклъла джыйылдыкъ,
Келе-келиб, алтын этегинге сыйнадыкъ.
Алтын этегинге джыйыб сыйлагъын,
Ауур сёгюнджю кёлтюртюб, бизни къыйнагъын.
Къарайбыз да кёб малынгы кёребиз,
Аладан бизге бермей эсенг ачдан ёлебиз,
Апсатыны барды сансыз, санаусуз маллары,
Кёб малынгдан бизге юлюш этсенг а,
Бийле, байла бирер къысыр ийнек сойдула,
Биз джарлыланы санга юлюшге къойдула.
Тау текени къарантхасы джар кибик,
Аны къарын джауун ачдыргъын бизге, къар кибик.
Апсатыны барды юч улу,
Бек чомартды аны кичи улу.
Кичи улуну аты Дыгылмай,
Атханыбыз бир атламасын, джыгъылмай,
Аякъ къыйыныбыз бу къаялада къалмасын,
Атханыбыз джыгъылмайын бармасын.
Апсатыны барды сары чачлы къызлары,
Кетиб барады, кёб малыны ызлары.
Тауларынгы башы болур белден къар,
Тауну башында бергин бизге ёлюр сау.
Бериринги мычытмайын бери эт,
Бермезлигинги кёз кёрмезча кери эт.
Берир кюнюнг саууб алгъан сют кибик,
Бермез кюнюнгде айландыраса ит кибик.
Къарт текени къолтукъ артындан окъ тийсин,
Аязысын, ариу, чыммакъ кюн тийсин.