Орайда, кюнюм, къыйнатхын,
Май къазанланы къайнатхын,
Бизге къан ырхымла чайнатхын.
Къошда джашлагъа чоюн эт,
Орайда, кюнюм къыйынлы!
Уллу джугъутурну союм эт,
Орайда, кюнюм къыйынлы!
Берсин бизге базыкъ боюнлу.
Сени джугъутурунг къаллай союмду...
Богъурдакъ кесдиргин къойчу челеклей,
Къабыргъасын тешдиргин элеклей.
Мийикде болады джугъутурну къаласы,
Аны къаласыды темир эшикли,
Аны баласыды алтын бешикли,
Аны бешик бауу — алтын билезик,
Алтын билезикле юздюргюн,
Джугъутурну чынгылладан джюздюргюн.
Танг болады, джаным джашла, туругъуз!
Аджаллыгъа сауут-саба къуругъуз.
Аджаллынг тюбесин аллыма,
Бермесин тушман къаллыма,
Берир болсанг, тыя келгин аллыма.
Сындыртхын ауур санларын
Бёркдюре чыгъаргъын ёбге къанларын,
Уруб сындыртхын ауур санларын,
Барды сени къулакъ сайын малларынг.
Да бер, къурманынг болайым,
Берир малынгы бер, хайда,
Бермез малынгы, кери айда.
Мараучу тангны тауугъу,
Ачыгъан бауур, сууукъ суу
Сени мараучунгу зауугъу.
Мараучудан джазыкъ джан болмаз:
Темир боюнсхасы бойнунда,
Кюйген гырджыны къойнунда.
Къайын къулакъ, тар сызгъа,
Ючню-тёртню бергин бир ызгъа.
Джугъутурунг тогъай башлы, токъ кёзлю
Тюшер къолгъа ётюрюксюз, сау сёзлю.
Тогъайбаш такъдыргъын тасма джантаугъа,
Алты бутакълы тийсин алтаугъа.
Болур таула башы бир кириш,
Ашхыгъа, джаманнга этмегин тенг юлюш.
Аны къаралдысы барды, джар кибик,
Аны къарын джауу акъды, къар кибик.
Аны къанын къаргъа тёкдюрсюн,
Анда ючню-тёртню бирге чёкдюрсюн.
Таб болады къарт текени джатыуу,
Къабыргъасындан къара шкокну къатыуу,
Унутмайма аны этини татыуун.
Сени джугъутурунг къаллай союмду!
Эчкилеринг болады ауур сёгюнджю,
Улакъларынг болады къазан аш.
Аллыбызда болсун хазыр тогъайбаш.
Джаным уланла, танг болады, барайыкъ,
Таб тюшгенлей, юлюшюбюзню алайыкъ!
Керпес этдиргнн къошда итлеге,
Бёсгюнле джарашыудула аркъа джюклеге.
Къошда джашланы къууанчы,
Ныгъышда къартланы джубанчы,
Орайда, кюнюм, ойнатхын!
Къошубузда май къазанла къайнатхын.
Къулакъ сайын кёб малынг,
Кёб малынгдан бизге сайлатхын.
Кетиб бара джугъутурну ызлары,
Апсатыны сары чачлы къызлары,
Бизге онг болгъанды басхан ызлары.
Болур танг къызлары гошалар,
Джугъутургъа къысыр эчки къошарла.
Сени джугъутурунг чунакъ къулакълы,
Сени эчкилеринг эгиз улакълы,
Эгиз улакъладан тигим этсенг а.
Сени берир кюнюнг сют кибик,
Бермез кюнюнгде айландыраса ит кибик.
Эгиз улакъланы бизге ызлатхын,
Мыйыкълагъа джау бузлатхын.