Нарт батырла жортууулгъа чыкъдыла,
Ала жолда отсуз, къуусуз къалдыла.

Сосурукъ да ол жыйында болгъанды.
— Бир от алып келейим, — деп жортханды.

5 Бир дорбунда от жарыкъны кёргенди,
Жукълап тургъан эмегенни эслегенди.

Ат юсюнден узалды кесеуюне,
Жинки тюшдю эмегенни кёзюне.

Жукъусурагъан эмеген узалды,
10 Сосурукъну, атны да къолгъа алды.

Аланы эмеген кёзюне салды,
Сосурукъ кюрешди, андан чыгъалмады.

Деу эмеген жукъ да сезмей жукълайды,
Кёзюнден а от жилтинле чартлайды.

15 Бир заманда, ол, уянып, сюелди.
Кёз ичиндеги атлыны сермеди.

Сейир болду: «Кимсе, къайдан келгенсе?
Мени кёзюме уа къалай тюшгенсе?»

— Биз, — дегенди, — нартла, чыкъгъанек жолгъа.
20 Отсуз къалып, келгенме от алыргъа.

Сен а сермеп кёз ичинге салгъанса,
Уяннгынчы барамталап къойгъанса.

— Сизде, — дегенди, — Сосурукъ деп бармыды,
Аны оюнларындан билемисе?

25 — Айхай, барды, уста таныйма аны,
Кёп кёргенме ол этген оюнланы.

— Сора айтчы, оюнлары кёпмюдюле?
— Оюнларын айтсам а, бек кючдюле,
Алай санга кереклиси ючдюле.

30 Бири буду: мен таугъа чыгъыучу эдим,
Уллу къаяланы оюп ийиучю эдим.

Ол ырбында къаяланы сакълаучеди,
Башы бла уруп, артха аудуруучеди.

Эмеген: «Хайда, сора, бир кёрейик!» — дегенди,
35 Нарт Сосурукъ тау башына миннгенди,
Эмегеннге къаяны оюп ийгенди.

Ол а, башы бла уруп ташланы,
Жангыз бирин да жибермей башлады.

Ташла, къушла кибик, учдула,
40 Сосурукъну тёппеси бла аудула.

— Аха, — дейди, — Сосурукъча ойнаймамы?
— Айхай, — деди, — андан да иги ойнайса.

— Экинчи оюну уа къалайды?— деп сорду.
— Ол а, — дегенд, — алтмыш сабан темирни

45 Отха салып, къып-къызыл къыздырады,
Жутады да, ызына чыгъарады.

— Ол да жарайд, жый да, къыздыр, хазыр эт,
Энди аны да бир кёрейик!— дегенд.

Сосурукъ темирле жыйып къыздыргъанд,
50 Сора эмегеннге: «Жут», — деп буюргъанд.

Деу эмеген темирлени жутханды,
Сууутуп, ызына чыгъаргъанды.

— Ай, бу уа нечик ахшы оюн эди,
Сууукъ къарным бир кесек жылынды!

55 Ючюнчюсю уа къаллай оюнд? — дегенди.
— Ол а, — дегенд, — къамиш кёлге кирирсе.

Баш токъмагъынг суудан тышында болур,
Къалгъанынг а суу тюбюнде турур.

Анд а, къыш чилледе, беш кюн ётдюрюрсе,
60 Кёл бузласа, къамиш бузну кётюрюрсе.
Сосурукъ да алай этип ойнаучед.

Деу эмеген къамиш кёлге киргенди,
Айтхан болжалына дери тёзгенди.

Къыш чилледе къамиш кёл бузлагъанды.
65 Сора эмеген тюбюнден кётюргенди,
Кёлню бузун чыкъыр-чыкъыр этдиргенди.

Ол заманда уа Сосурукъ къоркъгъанды:
— Жангылгъанма, энтда да беш кюн керекди, —

Деп, Сосурукъ эмегенни алдады,
70 Мондай эмеген да анга ийнанды.

Нарт Сосурукъ къамиш башланы ташыды,
Бузну жарылгъанларын да жашырды.

Сора Сосурукъ Тейриден тиледи:
— Беш жылны сууугъун беш кюннге эт! — деди.

75 Келди аллай бир сууукъ, ахырзаман,
Кёл бузлады, къатды ташдан да аман.

Сора айтды: «Ха, эмеген, силкинчи!»
Къымылдады, силкинди, болалмады,
Къысыр бузгъа милдеу да эталмады.

80 — Ай, медет а, адам улу, болалмайма,
Сосурукъну бу оюнун эталмайма!

— Къарт эмеген, Сосурукъ деген менме,
Энди уруп башынгы кетереме!

— Сен къаягъа чыгъа туруп, сезгенем,
85 Сен Сосурукъса деп, ишекли болгъанем!

Ай, байтамал! Энди кесмей къоймайса,
Сени сырпынынг эмегенни кесмейди.

Ал чачымы тюбюнде къылычымы,
Аны бла кесалырса башымы.

90 — Бу аман гадур хыйла этер, — деп къоркъгъанды,
Сосурукъ къазыкъ алып узалгъанды.

Къылыч къазыкъгъа секирип башлагъанды,
Жетген жерин кесип, юзюп ташлагъанды.

Кесе келип, къол тутумгъа жетгенди,
95 Сосурукъ да сермеп сабындан тутханды.

Эмегенни чачындан сермегенди,
Башын кесип, от алып кетгенди.