Ой, нартла чыкъдыла, къууаныб,
Борсукъ этлеге да джубаныб.
Туруб джолгьа чыгьыб кетдиле,
Бир тууар сюрюуге джетдиле.
5 Джокъду былайда сюрюучю,
Кимди, билмейдиле, кютюучю.
Ингирге дери отлалла,
Дорбуннга айланыб башлалла.
Нёгерлерин къоюб алайда:
10 «Тахса билейим, аланла,
Джашай эселе адамла,
Бизни да къонакъгьа алырла»,
— Деб, кетди къошха Сибилчи,
Чыкъды юч башлы эмеген,
15 Мангылайында — бир кёзю,
Кукадан толуб, айтхан сёзю.
Муну дорбуннга джыйды,
Аллына къаяны сюеди,
Отну шынкъарт джакъды,
20 Бир темир тишни табды.
Учу джити, чюй кибик...
«Тейри берди, деб, адам тишлик!»
Тиш да къып-къызыл болургьа,
Эмеген бурулду отун салыргьа—
25 Сибилчи, сермеб, алды къызгьан тишни,
Дженгил урду эмегенни кёзюне.
Эмеген сокъур болду,
Тангнга дери дорбунда къармаб-излеб турду.
Сибилчи да къутулду эмеген къоркъуудан.
30 Табмады тышына эшикни.
Энди къалай ачсын къая тешикни?
Танг атды. Кюн тиер заманда
Тууарла ынгырдаб башладыла.
Эмеген къаяны азчыкъ ачды,
35 Хар малын къармаб, сылаб джиберди.
Сибилчи къалды ичинде,
Эмеген этди тинтиуле.
Ашхам къарангы болургьа,
Отха отунла салды.
40 Биягьы тишни Сибилчи,
Кёрпозмей, отха салды.
Тиш да къып-къызыл болду —
Эмеген эшикни ачды.
Сибилчи, артындан барыб,
45 Къызгьан тишни чанчды.
Къаяны ийиб, Сибилчиге чабды,
Кёзюн мараб уруб, ол да эшикге къачды.
Эси да эмегеннге кетиб,
Тюзелиб сюреди деб, къоркъуб,
50 Кеси да, джан солуу этиб,
Келди нёгерлерине, къутулуб,
Ач ауузу да суусабдан тутулуб.
Ол ёзенден къачдыла, кетдиле,
Кече къалгъан джерлерине джетдиле.
55 Кюлню бери ачдыла:
От да кюйюб, джукъланыб,
Къарынны ичинде этлени табдыла.
Аламат татлы бишиб, джутланыб,
Адам ашарча, сукъланыб.
60 Тангны сакъламай, джолгьа чыгъыб,
Чаба-джорта, бек къыйналыб,
Айю къакъгъа джетдиле:
Джартысын къанатлыла ашаб,
Къалгьан-къулгъанны кёрдюле.
65 Къакъ этни тишлик этиб,
Чабырлары да джылтырыб, тешилиб...
Къатхан айю терини джибитдиле,
Тюклю чабырла этдиле.
Бир кюнню алайда солуб,
70 Кеслери да арыб, тозуб,
Нарт эллерине келдиле,
Сау-эсен джамагьатны кёрдюле.