Бисмиллях деп башлайым,
Салат-салам айтайым.
Адетде кюнде жетмиш
Мен тобагъа къайтайым.

Манга эт-жен адамла
Ким эсем да, билмейле.
Къуран окъуп тебиресем,
Тынгыларгьа сюймейле.

Сёзюнге тынгыламаз
Тенгинг болмагъан адам.
Жолукъгъанда да бермез
Таза жюрекден салам.

Алай, тенгледен бошап,
Айланма сен, бёрюча.
Энди кезиу келирми
Мен аланы кёрюрча?

Бу дунияда бек азды
Аз да тюрленмеучю тенг.
Ырахат жашаргъа сюйген –
Халкъдан болсун узакъ, кенг.

Халкъгъа къатышхан адам
Кёп инжиулени татар,
Аны бла биргелей
Гюнахлагъа да батар.

Къуранны хакъын билген
Болады манга жууукъ.
Аны хакъын билмеген
Жууукъгъа болур сууукъ.

Бизге къардаш тюйюлдю
Къуранны тюз тутмагъан,
Къуран айтханча жюрюп,
Халал ашны жутмагъан.

Бизге эгеч тюйюлдю
Шериатда турмагъан,
Къуран харам этгенден
Кесин артха бурмагъан.

Биз сюебиз тарийкъат
Тизгиннге тизилгенни,
Ибилис къауумундан
Къачып, бери юзюлгенни.

Ол тарийкъат деген зат –
Файгъамбарны жолуду.
Аны бизге тапдыргъан –
Мухамматны къолуду.

Тарийкъатны башында
Жарыкъ кюнюбюз барды,
Аны бизге тийдирген –
Мухаммат файгъамбарды.

Ол кюнню чыкъгъан жери
Минги Тауну къатыды.
«Олий Мухаммат» деген
Аны сыйлы атыды.

Аны кёрюп болмайла
Ауруу бийлеген кёзле,
Аны бизге къоймайла
Иймансыз, динсиз сёзле.

Тауладан а Минги Тау
Нелляй бирге ёр эсе, –
Олийледен аллай бир
Ёрдю ол да, кёресе.

Мен, ойлашып, къарасам
Аны хар бир хатына, –
Анга ушаш бир да жокъ
Акъылында, халында.

Жокъду учу, къыйыры
Аны терен эсини,
Бет тюрсюнюнде да бар
Ол ышаны кесини.

Аны сыйлылыкъларын
Айтыргъа да къыйынды:
Сыйлылыкъны барысы –
Аны ичине сыйынды.

Мен да, тобала этип,
Уллу Аллахха къайтама.
Бу нюр таугъа тыянып,
Тилегими айтама.

«Эй, Аллахны нюр тауу,
Табынама мен санга.
Аллах бла тилейме,
Ачыуланма сен манга.

Мени да хар гюнахым
Санга баямлай къалыр.
Сыннган бу аман жюрегим
Энди санга тыяныр.

Сенсе бек уллу себеп –
Уллу Аллахха жетдирлик.
Тобаланы къабырда
Тамам къабыл этдирлик.

Аллах санга кюч берсин
Ташаланы кёрюрге,
Санга къайтхан къауумгъа
Кёп игилик берирге.

Эй, Алахны олийи,
Сен кёресе халымы –
Санга аманат этеме
Бу къарыусуз жанымы.

Къыйын халлагъа тюшюп,
Жюрегим бек такъырды.
Сен къараргъа тийишли
Мени кибик факъырды.

Онглу – къайда да онглу,
Онглу кесин сюркейди.
Онгсузгъа сен керексе,
Онгсуз сени излейди.

Онгсузлагъа къараучу,
Манга да сен бир къара:
Жюрек жараларыма,
Ой мубарик, бир жара!

Хакимсе хар адамны
Сен жюрек жарасына,
Файгъамбарны орнуна
Келген халкъ арасына.

Аллах сени къутхарсын
Фитналаны барындан.
Аллах сени чыгъарсын
Жашауланы тарындан.

Аллах санга онг берсин
Динни ёрге сюерге,
Бизни Аллах тюзетип,
Сен да бизни сюерге.

Амин, амин, я Аллах!
Амин, амин, я Аллах!
Амин, амин, я Аллах!
Амин, амин, я Аллах!