Эй мубарик, Солтан-Хамит,
Адамланы сабыры!
Жаннет болсун, я Аллаху,
Аны жатхан къабыры.

Оюлгъанды, я Аллаху,
Жарлыланы къаласы.
Жюреклени мудах этди
Къалмай халкъыны анасы.

Дуниядан кетди жазыкъ –
Жарлыланы ёкюлю,
Хуррият байрагъын тутхан
Тау эллени кёпюрю.

Эй мубарик, Солтан-Хамит,
Жарлыланы атасы,
Ёмюрде сау болурму экен
Жюреклени жарасы?

Эй мубарик, Солтан-Хамит,
Жюреклени къыйдыргъан,
Битеу халкъны кёзлеринден
Къан жилямукъ къуйдургъан.

Эй мубарик, Солтан-Хамит,
Кёзюбюзню чырагъы!
Батып къалды жарлыланы
Жарытхан кюн тыягъы.

Къууанч болгъан кюнлерибиз
Мудах болуп батады,
Жарлыланы кёз жарыгъы
Жер тюбюнде жатады.

Халкъ ючюннге сойдургъанса,
Солтан-Хамит, санынгы,
Жарлыла ючюн къурман этдинг
Сен мубарик, жанынгы!

Жарлылагъа айтыучу эди,
Шариатны, олтуруп.
Аллыбызгъа келди, жазыкъ,
Алтын гулла толтуруп.

Жарлыланы иши бла
Apисeйгe кетгенед,
Анда ёлюрюн билген кибик,
Керти осуят этгенед!

Айтхан эди: «Къарындашым,
Залимлеге алдатма,
Ёлсем, мени мыллыгымы
Гяуурлагъа малтатма».

Баргъан эди сулх этерге
Чечен уруш жанына,
Кётюргенлей бара эди
Акъ байракъны къолуна.

Нёгерлери къоркъгъан эди
Аны бла барыргъа!
Намысына уялгъанды
Жарты жолда къалыргъа.

Ёлюрме деп къоркъмаучу эди,
Тюрлениучеди уялып,
Аты кишнеп барды халкъгъа,
Къызыл къаннга боялып.

Телеграмла урулдула,
Халкъгъа хапар берирге,
Гяуурла жиляп бардыла
Аны ёлюгюн кёрюрге.

Гяуур, муслийман къалмайын,
Суу къуйгъанлай болдула,
Аны ёлтюрген душманланы
Элине от салдыла.

Аны ёлюсюн кётюрдюле,
Машинагъа салмайын,
Биргесине чыкъгъан элле
Балшибикле къалмайын.

Аны къалмай хапарларын
Газет этип алдыла,
Юч округ арасында
Юч да къубба салдыла.

Гяуур, муслийман къалмайын
Аны сыйлы кёрдюле,
Аны ючюн хар башлыкъны
Тау эллеге бердиле.

Тау желлери, таууш эте,
Анга учуп жетерле.
Тюзледе да къанатлыла
Анга сарнау этерле.

Жарлыланы кёз жашлары
Жауун болуп жауарла.
Тюзде чыкъгъан кырдыкла да
Аны бла къанарла.

Жерде чыкъгъан жашил отла
Анга дууа этерле,
Кёкде айланнган къанатлыла
Анга жиляй кетерле.

Титирерле аны ючюн
Тауладагъы терекле,
Дууа этерле къалмай анга
Жети кёкде мёлекле.

Къыямат кюн толгъан айлай
Чакъмазмы экен къычырып?
Залимлеге жаханимни
Эшиклери ачылып?

Ако, мудах болмаймыса
Ол мурхумну халына?
Аны къанын алмай, къалай
Барырса Аллахны аллына?

1918