Кировха нёгер болгъанед
Жарлылагъа жараргъа.
Къара халкъгъа эркиниликни,
Эркинликни алыргъа.

Солтанхамит тау къушед,
Жаудан къоркъа билмеген.
Байла бла бийле элле
Ол жигитни сюймеген.

Солтанхамит жыгъылгъанед
Къаны къызартхан атдан.
Тауладан къан къатыш жауун
Жаугъан эд ол сагъатда.

Солтанхамит сёлешиучед
Намысына уялып.
Аты халкъгъа кишнеп келди
Къызыл къаннга боялып.

Душман огъу жыкъгъан эди
Аны тер басхан атдан.
Халкъ башчысы Киров анга
Жилягъанд ол сагъатда.

Киров жапханд ёлюгюне
Бек алгъа жамычыны.
Алтын гуллагъа салдыргъанд
Ёлюгюн ол батырны.

Солтанхамит болуучуед
Таулуланы батыры,
Жумушакъ болсун, я Аллаху,
Аны жатхан къабыры.

Сен ёлгенсе Ленин берген
Байрагъыны тюбюнде.
Жиляу этелле тауларынг –
Айырылдыла сенден.

Солтанхамит болуучуед
Таулуланы ахшысы.
Аны къарындан эгенд
Киров – халкъны башчысы.

Жигит ёлсе, жигитлиги
Къалад халкъны ичинде.
Кязим да бу жырны андан
Этед сени юсюнгден.

1918