Суу бойнунда ариу чакъдынг,
Сен Кязимни къууандырдынг,
Кишиуларынг жумушакъла,
Кёзню жапсаралла ала.

Сен былайгъа къайдан келдинг,
Жангызлайын къалай ёсдюнг?
Къыш къабышмай къалай турдунг,
Борандан къалай къутулдунг?

Жокъ эгечинг, къарындашынг,
Жокъ не жуугъунг, не хоншунг,
Ананг, атанг жокъ къатынгда,
Къалай ёсдюнг суу бойнунда?

Мен сени сындырмам, кесмем,
Кишиуларынгы да эзмем.
Мен аллайладан тюйюлме,
Сен, менден къоркъуп, ийилме!

Алыннгда мен ийилейим,
Санга мен хурмет берейим,
Жарлы жерими ийнагъы,
Тураса сен, чиммакъ чагъып!

Сенлай назикни кесерге,
Башына аман кюн берге
Сюйгенле аз тюйюлдюле,-
Жюреклери кюйсюздюле.

Сени ала кёрмесинле,
Эчкиле кемирмесинле,
Кюйсюз желле бюкмесинле,
Кюйсюз къолла кесмесинле!

Биз жашагъан дуния кюйсюзд,
Кёп жан жоюлад кезиусюз!
Сакъ бол, тау суу бойнунда тал,
Ёс, чакъ, къууан! Хайда, сау къал!

1913