Эй-хей, жашла, назмучула,
Эскиликге сиз даучула,
Къарангы къыстаучула,
Сезюгюзде жокъду чола!

Кеп окъуйсуз, эрикмейсиз,
Жазгъынымы эниклейсиз,
Бу замандан не тилейсиз.-
Сют башында кемюклейсиз!

Ббилмейсиз сиз арсарлыкъны,
Махтайсыз бек ынгкъылапны!
Айхай, жашла, керти затды,-
Ол зулмуну букъулатды!

Жырлайсыз,этесиз байрам,
Тюйюлсюз Кязимча хайран,
Хар зат иги, хар зат тамам,
Болмайды арбасы аугъан!

Иги эди жарыкъ жазгъан,
Бир жерде да кермей азгъан!
Алай андан неди файда,
Кеси келген насып къайда!

Атта-не-асыу, озду кюнюм,
Кеп эштилди мудах кюйюм,
Бу дуния байрам тюйюл,-
Айтмадым мен аны сюйюп!

Кюн тийгенде буз да жауар,
Арба тюз жолда да ауар,
Къууанч этген бирде жиляр,-
Жашагъаннгъа елюм да бар!

Кеп жашдым, ууаз бере,
Къарт болдум, палахла кере,
Къыйынлыкъ кеп энтда жерде,
Жарамаз кезбау этерге!

1933