Къарындашым, тынгыла манга:
Бир хапар айтайым санга,
Сен шексиз ийнансанг анга –
Кече жукъламазса тангнга.

Ёлюм келир бизге билмей,
Алып кетер бизни сюймей,
Биз барырбыз жиляй-кюлмей.
Киши къалмаз мында ёлмей.

Къангагъа салып жуудурур,
Басхычха салып къуудурур,
Юсюбюзге къум къуйдурур,
Мункир, Накирге буюрур.

Мункир, Накир келир бизге,
Сууал этер бизге, сизге,
Бюсюремезле сёзюбюзге.
Тебинирле кёзюбюзге.

Ой, не этербиз ол заманда, –
Бизде къарыу къалмагъанда,
Жууабыбызны алмагъанда,
Бир болушлукъ болмагъанда?

Къысса бизни къабырыбыз,
Нечик чыдар сабырыбыз?
Юфгюрюлгенде сурубуз –
Биз къымыжалай турурбуз.

Сюрдюрюрле артыбыздан,
Жюкле салыр сыртыбыздан,
Терле агъар чархыбыздан,
Айырырла жартыбыздан.

Бу ишлени биз кёре туруп,
Нек жюрюйбюз ёре туруп,
Не этербиз ёле туруп,
Жаныбызны бере туруп?

Биз кёрлюкбюз бу халланы,
Биз берликбиз бу жанланы,
Къоярыкъбыз бу малланы,
Чиритирбиз бу санланы.

Нек жаншайса, Кязим харип,
Гъафилликге мугътариф,
Кёп гюняхлагъа мугътариф,
Кечсин гюняхларын Латиф.

Аллах аны керти этсин,
Муратлагъа тамам элтсин,
Сыйратындан чабып ётсюн,
Ахырда жаннетге кирсин!

/?/