Бисмиллях деп башлайма –
Ийман-ислам айтыргъа.
Аллах, биз халкъны тюзет
Хакъ жолуна къайтыргъа.

Махтау бары – Сангады,
Сенсе бизни жаратхан, –
Акъыл, анг, билим берип,
Буйругъунга къаратхан.

Салауат-саламла сал
Мухаммат расулунга, –
Ахлуна-асхабына,
Хар бир мукъмин къулунга.

Отуз эки фарыз бар
Акъыл-балыкъ болгъаннга.
Борчду аны билмеклик
Ийнаныуу толгъаннга.

Аладан алты фарыз
Иймандады, – билигиз,
Аны билип, ийнанып.
Ийман диннге киригиз.

Ол фарызланы билмей
Неда алагъа ийнанмай,
«Ийманым» деп кюрешген –
Ол къойсун бош къыйналмай.