Къарачай халкъны эл берген джомакълары

Къарачай халкъны эл берген джомакълары суратлау джаны бла тамам сейир-тамашадыла. Аланы тиллери, башха аууз чыгъармаланы тиллерича, кесгинди, табды, сыйдамды. Ненча омакъ, ненча къыйдырма сёз кёребиз биз алада. Затны шартын суратларгъа миллетни кемсиз чемерлиги бу джомакъладан белгилиди: «Чалман толу акъ къозу» (Тишле); «Къая артында - буруш терек» (Чач эшме); «Сабан тюзде - сыргъалы тауукъ» (Зынтхы).

Эс бёлюннюк затны шартын, болумун уста суратлау бла бегирек кёлтюртюр ючюн, джомакълада эпитет кеб хайырландырылады. Ма ала быллайладыла: «къара чегет», «терен къол», «бела ат», «сары бийче», «къуба ёгюз», «пелям алаша», «сары мая», «дары аш», д.а.к.