Мен сёзлени бирин атыб, бирин тутуб,
Бирин алыб, бирин салыб, бирин джутуб,
Бирин сиреб, бирин тиреб, бирин сыгъыб,
Айтымлада бош джер болса, бирин тыгъыб...

Не зат этдим, не этмедим назму къурай,
Рифма этер ючюн, сёзню юч-тёрт туурай,
Кёз кёрмезлик, къол тутмазлыкъ затланы мен
Тенглеширдим. Тизгинлени да кёнделен

Тизиб бошаб, бир сейирлик затны этдим.
Окъуб чыкъдым, джер назмудан узакъ кетдим,
Адам акъыл джетмез джерге учуб джетдим.

Магъанасы къайдады? — деб сорадыла,
Хыртлаучула сёзлерими орадыла,
Оргъан кибик камсык бала кюн таякъны...

Мен а, джангы назмум ючюн бал аякъны
Кёлтюреме, ичеме да бек къанама,
Джаша, поэт! — деб, кесиме къууанама.
Къычырама: «Поэтлеге пачама!
Джангылыкъла ачама!
Эскиликни чачама!
Джер джашаудан къачама!
Джити къылычма!!!
Ичимден а бир аууз келеди:
Энди болдунг, кёб...!
Джюрегим анга джарылыб ёледи!..

Закий болуб кесиме бек базмасам,
Сора, быллай «джангъшыкъла» джазмасам,
Не этейим, мен да Аллах джарлысы...
Мени кёлюм башха не бла джарысын?!

Болумуму ит кибик да билеме...
Сен, окъуучу, тишлеринги билеме,
Не десенг да сен, джазма — деб, тилеме,
Мен да сенден тилемезме башха джукъ,
Аллах ючюн, китабымы окъуб чыкъ!

1985 дж.