Бюпон джол да кёрюнеди бир узун,
Кючден джетдик. Басыннганды джамагъат.
Къабыр ачхаид ол тоюмсуз ауузун,
Джырчыбызны джутарыкъды бусагъат.

Аязчыкъда шууулдагъан терекле
Шош болдула, бушуу митинг ачъшыб.
Келгенлерин кёргюзюб бир бёлекле,
Сёз этелле арлакъ-берлакъ чачылыб.

Къызгъанмайды биреу махтау сёзлерин,
Кёбден бери хазыр кибик бу кюннге,
Окъуйд, алмай къагъытындан кёзлерин,
Къолу къоша байрам шартны ёлюмге.

Сёлешелле кёб тишырыу, эркиши,
Ёлюкден да сый табаргъа джутлана,
Къагъытладан окъуйдула эришиб,
Сахнадача, кеслерине сукълана.

«Къагъытчыла» бир борчларын толтуруб,
Къагъытларын хурджунлагъа тыгъарла,
Кёб да турмай сюрмелерле, олтуруб —
«Къайгъы сёзле» газетледе чыгъарла.

«Хахайлатмайд» бюгюн бушуу бирлеии,
Джюрек джара кёрюнмейди, ташадад.
Эринлерин къаты къысхан эрлени
Тинлеринден, джыламукъча, къан агъад.

1985 дж.