Бир чалыкъды, бир камсыкды тайчыгъым,
Чабыб кетсе, бек къыйналыб къайтады,
Къайтса, энди кишен салыб тыяйым., —
Деб тебресем, кишнеб алай айтады:

«Бек анасы джыламаз деб, кишенни
Бош саласа, юзюб эркин джашаудан.
Юзмез эдим кесинг салгъан джюгенни,
Сен да хаман кетмей турсанг къатымдан.

Джангур джауар, кюн кюйдюрюр кишенни,
Тура туруб, бир замандан юзюлюр.
Эркинликге чыкъсам, джангы халими
Чалыкълыгъы сеннге умут юздюрюр».

Табалмайма сабыр этер бир дарман,
Бек къоркъама кюйюб къалад деб джашлай,
Онглуладан туугъан, джазыу къаргъагъан,
Тайчыгъымча ёксюз, камсык — Къарачай.

1981 дж.