«Мен сюймекликден дюккюч болгъанма,
Джаз чырпы болуб чакъмазча».
Мени кемлигим тенгледен неди,
Сенича бирни табмазча?

Ариуум дедим, Наныгъым дедим,
Къалай демедим атынга?..
Насыб джюгенни джазыугъа бериб,
Баралмай къалдым къатынга.

Неми да сеннге атадым, ариу,
Ёхтемлигими унутдум,
Джаз чагъыб келген насыб гоккама
Сууну кёб къуя къурутдум.

Элекге къуюб сууну бергенча,
Сюймеклигингден бердинг сен,
Мени тёзюмюм чексиз болгъанча,
Джарсыула къуюб кердинг сен.

Джазыуум ушайд къобхан тенгизге,
Къыбламам джокъду, къайдад джол?
Хар батхан кюнюм батхан кемечад,
Мыдах къарайма, булгъай къол.

Боран шаушалса, кёк чууакъ болса,
Сеннге кюн тийсин, меннге—ай.
Айгъа къарарма сеннге ушатыб,
Къалсам да дайым сууукълай.

1979 дж.