Джел булутну теберди да,
Кечеги кёк тебренди да,
Къайыкъгъа ушаш джарты ай,
Джюзюб башлады ашыкъмай.

Бир джолоучу, айгъа къарай,
Джел чайкъагъан джаш бусакълай,
Сюеледи атлаялмай,
Айгъа бир затла шыбырдай.

Кёлюн къалдырыб джазыуу,
Джюрегиндеги джарсыуун,
Айтыр адам табмай базыб,
Айгъамы тарыгъад джазыкъ?

Тура-туруб бир кесекден,
Кесилген кибик тюбюнден,
Тюз сыртындан тюшдю джерге,
Айны джокълай къарайд ёрге.

Кюле келиб, бир джырлайды,
Хахай этиб, бир джылайды,
Бир джазыуун ириятлайды...
Ушакъ нёгери уа айды.

(Сау — эсен бир чыкъса тангнга,
Башхалыкъ боллукъмуд анга?)
Сарысмакъ кесек — джарты ай,
Джерге къарайды сукъланмай.

1979 дж.