Сууутмазгъа кюрешеме ишими,
Кюрешеме халкъдан артха къалмазгъа,
Кесим билиб, ачытмадым кишини,
Кюрешеме сёз бла джара салмазгъа.
Бир ачы сёз айтъшса уа кесиме,
Сау болмазча джара тюшед эсиме.

Кечалмайма меннге джара салгъанны!
Кечимсизлик, къарыусузлукъ — эгизле.
Сыйынмайды чыртда сёзню джалгъаны,
Сыйынсала да кёлюме тенгизле.
Ол кёзюуде табигъатха кетеме,
Тёгерекге къараб оюм этеме...

Джанбаш бола суу бабуш да учады,
Сууну узун кесе тюклю «къамасы»,
Алай дженгил сау а къалай болады,
Сыйдам кёлню къанат салгъан джарасы?
Нек болмайды джюрек джара дженгил сау?
Тохтаб тургъан кёл болмасын деб джашау.

1979 дж.