1. ШОРБАТ ЧЫПЧЫКЪ

Акъджал боран эсирикден
Ойнакълайды орамлада,
Сен а, юшюй, щорбат чыпчыкъ,
Олтураса джангыз кесинг,
Узакъ болмай тереземден,
Наз терекни бутагъында,
Айт, къыйынлы, кимге тансыкъ
Бола болур азгъын эсинг?

Къайдадыла бюгюнлюкде
Сени джайгъы кеф шохларынг?
Арагъыз а энди сизни
Къыш бла джайча башхамыды?
Толмай къалгъан болурламы
Этген ашхы муратларынг?
Огъесе уа, ёхтемликден,
Тининг сууукъ ашхаммыды?

Къыямада чыпчыкъланы
Ышыкълары — джылы щорбат...
Къалгъанлагъа ушамагъан
Бир джанмыса алгъындан да?
Ай, алай а, джангыз къалгъан
Бир кёзюуде къоркъунч болад,
Сууукъдан да, таб атадан
Джылыу табмай къалгъандан да!

Сени кибик джангызлыкъны
Сынагъанла бир кёбдюле,
О, боллукъду къыйналгъанынг,
Тереземден кир сен юйге.
Бизни сакълагъан бар эсе,
Биз барайыкъ ойнай-кюле,
Эсибизге кемсиз узакъ,
Кемсиз джууукъ джайгъы кюннге.

2. ТЕНГИМ — СЫННГАН КЪАНАТЫМ

Бу къыш чилле къоймай къутсуз къылыкъны,
Орнатады- тинде ийнамсызлыкъны,
Ышыкъ излей абрек чыкъгъан тиниме,
Атланнганма джоюлмазлыкъ тенгиме.

Юйде джокъду тенгим, аны билеме...
Ачхычым бард, ачама да киреме,
Межгитдеча тазачыкъды ишчиги,
Бир сууукъду, бир сууукъду пешчиги.

Акъ къагъытча кёрюнеди къабыргъа,
Сагъышымда сёз джазама шош джыргъа.
Сабыр-сабыр кюзгю бола «къагъытым»,
Андан къараб тенгим — сыннган къанатым —

Сёлешеди: «Сау бол джокълагъанынга...
Шорбат чыпчыкъ болуб джаным, юйюнгю
Джокълаучанды. Кёрюученсе, сен анга
Тёгюученсе, мыдах болсанг, кёлюнгю.
Санларымдан хапар сорма, кёресе,
Мен къынында тот ашагъан къамадан
Башхам болмай, ма турама тынч-эсен...
Къыйын джашау ашхыд къабыр тынчлыкъдан!
Къыйын джашау — таза джашау адамлыкъ,
Сен кёрлюксе энтда ненча пасыкъны?!
Мыдах болма, туудурады мъщахлыкъ
Кемсизликни — Джабрайилин насыбны.
Кемсизликди джюреклени тар этген.
Тар джюрекли — келечиси бущууну!
Кенг джюрекди хар нени да бар этген,
Олду ара багъанасы джашауну!
Сеничала бу джашаугъа — багъана...
Джауунгу да ышарылыб тут къолун,
Джашаудан да болмаз эди магъана,
Хар адам да билсе кеси болумун.
Аманлыкъны кючюн алгъа кёралгъан,
Сёз бла аны джыкъгъан — борчу джырчыны,
Ол кюрешге кесин саулай бералгъан —
Олду халкъны тини, сууу, гырджыны,..
Алай, халкъдан кесин сюйген джырчыны
Айтыр сёзю тауусула тебресе,
Билдирирге излемейин ол аны,
Дауур ачад, джаулары уа — ол, мен, сен,..
Ашыгъады замансызлай кетерге,
Атын «АЗАБ ЧЕКГЕН ШЫЙЫХ» этерге.
«Шыйых» болма, сен адамча джашаб кет,
Сёз табмасанг, сабийлеге хойнух эт...
Кеси кесин джойгъан — олду эм тынч иш,
Ол иш адам баласына — баш бедиш!
Бир болгъаед джашар мадар джангыдан,
Къартлыгъымда манга боллукъ таянчакъ
Балалагъа ишлер эдим оюнчакъ
Манга къабыр къалакъ боллукъ къангадан!
Ёлген бола кёре эдим акъъшлы,
Кишиге уа керек болмайд акъъшы.
Бир кёб айтдым, мен бермейме сеннге дере,
Дунияда къаладыла джыр бла эс...
Экиси да барды сенде, джигит бол!
Хей, ашыкъма тутаргъа уа бери джол!
Арт сёзюмю джюрегинге терен джаз!» —
Дей, узакъдан узакъ кете, бола тас,
«Кюзгю» «къагъыт» бола, къагъыт — къабыргъа,
Мен къарайма къуруб тургъан тыбыргъа.
Эшикдеча къар джауады джюрекде,
Бир сууукъду, башлагъанма мен бузлай.
Терезеге тие тургъан терекде
Шорбат чыпчыкъ олтурады джангызлай!
Мен шашамы башлагъанма, ай медет?!
Джашау деген къалай татлы, сууукъ эд...

3. КЪАЙЫТЫУ

Тау шахарны келе болур джукъусу...
Бирем-бирем джукъланалла чыракъла,
Джол джанлада сюелелле бирча узун,
Акъ кийимли бегеуюлле — бусакъла.

Илгеннгенча, боран къояд джукъусун,
Узун джолум ушамайды узакъгъа,
Терен солуй къышны кюмюш букъусун,
Мен барама джангызлыкъгъа къонакъпъа.

Ашыкъмайын келгенликге, киреме
Патарчыкъгъа, къайтарама эшигин...
Къабыргъада къыл къобузну кёреме,
Ауаз беред, бард дегенча терслигинг.

Къыл къобузгъа узалалла къолларым,
Бармакъларым къурч къылланы джъшата,
Кёз аллыма келе джашау джолларым,
Акъ тылпыуум патарчыкъны джылыта...

Кетген насыб къайтырыкъгъа ушамайд,
Сууукъдан да бек къысады джангызлыкъ,
Гюнах ишни этдирирге унамайд
Ышандыра бир белгисиз джарыкълыкъ.

1983 дж.