Бийдир а Джабогъа туугъан эди эки ул,
Тамадасына бир хомух Къайсын атадыла,
Кичисине джигит Бекмырза - дейдиле.
Джигит Бекмырза анасындан туугъан кюнюнде,
Ол эр киндигин къыбылагъа айланыб кесдирди,
Эр кийимлерин тюз тобугъундан бичдирди.
Аны онбеш джылы толу джетген кюнюнде,
Атасы Джабогъа ол онбеш джесир тюшюрдю,
Анасы Къымсагъа дарий тобла тешдирди.
Бекмырзалар дейле, халал туугъан джигит Къайсынлар,
Аланы эллерине хан къонакъла келдиле.
— А къонакъла, не излейсиз, не этейик —деди Бекмырза,
Мал керек боса, кеси элибизде табайыкъ,
Джесир керек боса, узакъ эллеге барайыкъ.
А о заманда атландыла, кетдиле,
Бара бардыла, бир къойчу къошха джетдиле,
Къойчуладан тишликге алгъаненг къашха къой.
— Сенден джаш эсем — деди Бекмырза Къайсыннга,
Эрлик юлюшюмю башха къой,
Болалмай эсенг кетчи сослан ташдан, ташха къой.
Эй, джукъладым да мен тюш кёрдюм:
Атам Джабону кёргенме, Къайсын, тюшюмде,
Аны алгъын кибик юллеси джокъду къолунда,
Алгъын .кибик аны орну джокъду джеринде.
Юллесини мурса къаурадан сабы бар,
Сол джаягъында къачан тюшген табы бар.
Биягъы атамы бёрю тону юсюнде,
Ол бёрю тонну чыначыкъдан аллы дженги джокъ,
Къатында олтургъан аны бурун кибик тенги джокъ.
Ай алай болса кел, ызыбызгъа къайтайыкъ,
Ол эки дженги ма экибизге кёрюнед.
— Да къайтыб барыб анда къатынлагъа не айтайыкъ?
Сен кёресе, хомух, аланы джашлыкъдан.
Тюш дегенинг джукъуланы богъуду,
Тюшге ийнаннган адамланы джогъуду.
Ала атландыла, къойчу къошха джетдиле,
Къойчу къошда тюшюб оноу этдиле.
Сен къойчуладан тишликге алгъаненг къашха къой,
Сенден джаш эсем да — деди Бекмырза,
Эрлик юлюшюмю башха къой.
— Джелим къозгъалгъанды, джанла да мени ташха къой — деди Къайсын
Да Сюзме кёлден джесирле ётерле,
Ала Сюзме кёлде джесирле бла ойнайла,
Артларындан эбзе аскерле къоймайла.
Ала джесирлени ойнаб-кюлюб алдыла,
Эскерчи, Бекмырза, артда оюнла бардыла.
Мени къарыуум джокъду, хайырсыз тобукъла тутхалла — деди Къайсын,
О гяур джелим мени къозгъалгъанды, иймейди.
Да мен сени, о Къайсын, къоюб кеталмам,
Къарачайгъа мен о л хапарны элталмам.
Сен такъгъан сарыкъулакъны эбзелеге бермезме,
Джангыз къарнашымса, сенича кишини кёрмезме.
Да сени къоюб мен къалай барайым,
О хапарланы къатынлагъа къалай салайым?
Алай болса ала къазауат этелле,
Ала, бир-бирлерин сюйген къарнашла.
Джибермейд Бекмырза, джолну келгени тыяды,
Не ант этсенг да бир хатхудан чыкъгъан болады.
Къайсын джылайды, бу гяур санланы джыймайын,
Бекмырза кюрешед, джолланы кесиб болмайын.
Къазауат этди окъланы онусу тийгинчи,
Эм ахырында тюз садакъ келиб тийгинчи.
О заманда айтад къарнашына къычырыб:
— Сарыкъулакъны, тилерикме, джууугъунг кибик кёрмечи,
Эбзеледе танымагъанлагъа бермечи
Алагъа иймезее, сен Сюзме кёлге иерсе.
Къайсынны джаны тюгел чыгъыб кетгинчи,
Одалгъы ёзенден биреу аууб джетгенди:
— А Къайсын, танымагъанлагъа бермечи,
Танымагъан ит ашагъандан, таныгъан бёрю ашасын,
Сарыкъулакъны манга берсенг деб тилеем.
— Алай боса кёзлерим иги джетмейлер,
Санларым мени айтханымы зтмейлер,
Джууукъ келчи, сарыкъулакъны санга берейим,
Къайсы Одаллыдан аууб келген сен эсенг,
Мен сени иги таныб берейим.
Да джууукъ келди, ол ышанмайын келгенед,
Къайсынны санлары джюрюмегенин о кюнледе кёргенед.
Сарыкъулакъны санга, эбзе, берейим,
Къарнашым Къайсынча мен сени кёрейим.
Айтханы бла ол эбзени сермеди,
Осуятха тюз болду Къайсын, сарыкъулакъны анга бермеди.
— Махтандыргъан бычагъынг сени бу эсе,
Алмайма сен джюрютген къылычны (уруб эки этгенин билмегенди)
— Ары атласанг кёрюрсе кюнбет ныгъышны,
Санга берлик тюлме, береме Сюзме кёллеге,
Да сиз кирмезеиз Къарачай ёлмесе бу джерлеге.
Алай бла ала тоноуланы бермелле.
Къанлы ауушда джангур къатыш къан джауду,
Ол эксисине уа къызыл ала къан джауду.
Да Бекмырзала, алагъа айталла Къайсынла
Болалмай эселе ала джолдан джанлаб болсунла.