Атланы бек сюйген, къарачай-малкъар, къазах, къыргъыз джырланы уста джырлай билген, кеси aт белинде джырла эте мал кютген — анамы гитче къарнашы Къазийланы Шенукъаны джашы Солтан-Хамитге бу аджирни «суратын» саугъа этеме.
Кёргенмисе, сен, ма быллай аджирни?!
Къошунтуякъ аякъларын тик урад,
Джити къурч наллары къаза таш джерни,
Огъурсунмай бурну бла сызгъырад.
Къамиш къулакълары дженгил къымылдай,
Тюе кёзле кибик джана кёзлери,
Быгъынлары джазгъы кюнде къалтырай,
Кёксюл бола ёшюнюнде тюклери.
Дууадакъны бойну кибик бойнунда,
Он элиден бирер хырза кёрюнед,
Ингичгеден къучакъ джетер къарнында,
Хар бир къан тамыры ачыкъ билинед.
Кенг ёшюню, къарыш джетер чатлары,
Джохар, джалы, бек мийикди муддасы,
Къол бла этилгенча бютеу санлары,
Кюмюш ат кереги — ёгюз багъасы.
Хырзалы джулдуз къашхасы къуу башын,
Бютюн ариу кёргюзеди, бир къара!
Бир кёрюред муну ашагъан ашын?!
Атны бакъсанг, ма бу аджирге бир къара...
1975 дж.
