Элияны ынгычхагъан тауушу
Кючден-бутдан къулагъыма джетеди.
Джылай-джылай кёз джашларын тауусуб,
Къачхы джангур джаугъан кибик этеди.

Къызыу джюрюй арыгъанды алашам,
Энди ол да ашыкъмайын элтеди,
Тюз джерчикге джетсек, меннге кёл ашаб,
Джоргъалагъан кибикчикле этеди.

Ол кёзюуде, аякъ тюбден батмакъла
Чартлаб барыб, сары хансха тиелле.
Кёк къачлары болгъан дохтур артмакъла
Алашамы эки джанын тюелле.

Къарт атамдан къалгъан плашым джангургъа
Эртделеде кибик тыйгъыч болалмай,
Тишлерим да къалыб терк харе урургъа,
Мен барама акъ ауушдан кёз алмай.

Бу дунияда мен билген зат — юй бла къош.
Аекерден да тилеб болджал алгъанма.
Сууукъ, ачлыкъ,.. ол барысы бошду-бош!
Мен окъургъа баралмайын къалгъанма.

Бу сагъатда Аллах артмакъларымы
Бир толтуруб къойгъа эди ачхадан!
Элтиб бериб, къууандырсам анамы,
Сюйюб чыгъар эди ташлы бачхадан!

Улху бериб, болджал алыб аскерден,
Келир джыл а мен окъургъа къачарем!
Эм насыблы джашладан бир болуб мен,
Институту эшиклерин ачарем!

Неуа, атам болгъан болса директор,
Таб Москвагъа кетиб, иги окъурем!
Къуллукъчула меннге болур кибик къор,
Хубий улу кибик райком болурем!

Бюгюнлюкде джол хакъгъа да ачхам джокъ,
Чабханлыкъгъа совхоз айлыкъ бермейди!
Директор а, чёгед болуб бютюн токъ,
Джакъсызланы джарсыуларын кёрмейди!

Тюкленмеген къуш балача уяда,
Кёкге къараб, джан кёрмейин азама.
Мен а, кимге керекме бу дунияда?
Джашлыгъымдан башха неме базама?

Къар бурхула джауадыла ашыгъыш,
Тюгел къаргъа бурулуб да кеталмай.
Соруууму джууабына джокъ чыгъыш —
Деб, барама, кёлюмю хош эталмай.

1975 дж.