Жарлы чыпчыкъ, бу къар кюн
Къабышырса арбазда.
Жылы тыгъырыкъ, аш да
Жокъмуд санга дунияда?

Жарлы чыпчыкъ, къыш къыртчин
Сени юшютюп къояр.
Сенлай жарлы бу къар кюн
Къайда жылыныр, тояр?

Бизде да, сени кибик,
Жарлы адам кёп барды.
Жарлы адамлагъа да
Дуния сууукъду, тарды.

Жарлы чынчыкъ, ма гыржын
Бурхуланы берейим.
Сени аллах палахдан
Сакъласын деп тилейим.

Сен юшюмей, жоюлмай,
Кёк жазгъа саулайын чыкъ,
Киштик марлап тутмасын,
Сакъ бол сен, жарлы чыпчыкъ.

Къарыусузну жашауу
Къыйынды бу дунияда,-
Душманы кёп болады
Чач тюгюнден башында.

Бу дунияда душманы
Жокъну къайда табарса?
Сакъ болмасанг, керексиз,
Терк жолуюп къалырса.

Сакъ бол, жарлы чыпчыкъчыкъ,
Жашчыкъла алдамасынла,
Гыржын бурхула атып,
Тузакъгъа салмасынла!

Къар кюнде, сууукъ кюнде,
Жарлы чыпчыкъ, юшюйсе.
Сен, жарлы ёксюзлеча,
Юйсюз, ашсыз жюрюйсе.

1907