Алтынчысы – ийнаныу
Къыямат кюн болмакъгъа,
Хакъ тирилтип, жер юсю
Махшар халкъдан толмакъгъа.

Ол кюн болур ючюннге,
Исрафил сургъа юфгюрюр,
Андан чыкъгъан къычырыкъ
Битеу халкъны ёлтюрюр.

Сора Аллах жер юсюн,
Чагъып, тюппе-тюз этер,
Хар ким ёлгенден сора,
Тамам да къыркъ жыл жетер.

Исрафил сургъа юфгюрюп,
Махшар халкъы тирилир.
Къыямат хакъ болгъаны
Ол заманда билинир.

Адам улусу бары
Къымыжалай тирилир.
Алай тёрт къауум адам
Дуниядача кийинир.

Кийинишип къобарла
Амбия, шухадахла,
Аулияла эм хакъдан
Таймагъан гъуламахла.

Сора Аллах хар жанны
Ол кюн махшаргъа жыяр.
Омтазу кяфырланы
Жаханимине тыяр.

Мёлекле адамлагъа
Китапларын берирле.
Ала ол китаплада
Этгенлерин кёрюрле.

Китап онгдан берилсе –
Бек тынч болур хыйсабы.
Артдан, солдан берилсе, –
Къаты болур гъикъабы.

Тюзлюк базманы ол кюн
Адамлагъа берилир,
Ала дунияда этген
Ол базманда чегилир.

Игилиги кёп болгъан –
Нюр жаннетге къутулур.
Аманлыгъы хорлагъан –
Жаханимде тутулур.

Сыйрат кёпюр махшардан
Нюр жаннетге тартылыр,
Тюбю – жаханим, ары
Ёталмагъан атылыр.

Сыйрат кёпюрню узуну
Юч мингжыллыкъды, таны:
Бири – энш, бири да – ёр,
Бири – тюп-тюздю аны.

Сыйрат кёпюр кенгди, тынч
Жаннетге барлыкълагъа,
Къылдан инчге, къылычдан
Жютюдю къаллыкълагъа.

Ол сыйратдан ётгенле
Тюрлю-тюрлю болурла:
Бирлери, женгил ётюп,
Жаннетледе солурла.

Бир къауумла жолоучу
Жюрюшюнде ётерле.
Бирлери уа, ёталмай,
Жаханимге кетерле.

Кяфырлыкъда кетгенле –
Дайым анда къалырла.
Гюнах ючюн кетгенле –
Шафагъатчыла алырла.