Бешинчиси – ийнаныу
Аллахны къадарына,
Къадар болуп бошады
Боллукъ затны барына.

Бу «къадар» дегенибиз –
Юлгю демекликди, бил.
Аны толу ачаргъа
Бир халкъда да жокъду тил.

Хар затны халын билип,
Боллукъ юлгюсюн салгъан,
Къачан къалай боллугъун
Лаухул мафхузгъа жазгъан.

Лаухха жазгъан хар заты,
Бузулмайын, боллукъду,
Аны салгъан юлгюсю,
Тюрленмейин, толлукъду.

Къадар этген Аллахды,
Ишни этген къулуду.
Бу дуния ахлулары
Жин бла адам улуду.

Къулуна уллу Аллах
Эркинликни береди,
Жюрегинг сайлагъанны –
Жюрегинде кёреди.

Жюрегинг сюйген затны
Этерге тебиресенг –
Хакъ унаса, кюч берип,
Этдиреди, тергесенг.

Унамаса, адамла,
Жинле, мёлекле – бары
Тепдиралмазла тюкню
Тюшген жеринден ары.

Сайлап, сюйюп, игини
Этгеннге берир сууап,
Сайлап, сюйюп, аманны
Этгеннге берир азап.

Илинмек ажал бирди,
Башха ажал келмейди,
Ажалда жазылгъаны
Жетмей, адам ёлмейди.

Адам къолундан ёлген –
Ажал жетип ёледи.
Билип, сюйюп ёлтюрген –
Жаханимге киреди.

Мукъминле бир бирине
Чабып, бири ёлтюрсе,
Ёлген да жаханимли,
Урургъа къол кётюрсе.

Адамлада бузукълукъ –
Бири бирин сёгери,
Бир бирге душман болуп,
Адам къанын тёгери.

Жазылды ол лаухда
Адам жаратылгъынчы,
Адам, Хауа, терекден
Ашап, бери атылгъынчы.

Жазыкълыкъ башланнганды
Адам бла Хауадан,
Бузулмакъны себеби
Болур нафсы хауадан.

Адамны, Хауаны да
Аллах, кеси жаратып,
Жаннетине салгъанды,
Нигъматлагъа къаратып.

Айтханды: «Нигъматладан
Сюйгенигизча ашагъыз,
Алай ма бу терекге
Жууукъ бармай жашагъыз.

Нек десегиз, сиз андан
Ашасагъыз, бурулуп,
Къалырсыз зулмулукъгъа,
Бу халыгъыз бузулуп».

Ибилис алдап, была
Терекден ашадыла,
Нюр жаннетден къысталып,
Къыйынлы жашадыла.

Сора Адам: «Раббана
Заламна», – дегенни айтды,
Аллах тюзетип, кечип,
Керти тобагъа къайтды.

Ол терекден ашамакъ –
Урлукъларын бузгъанды.
Ол бузулуу аурууу
Жашларына жукъгъанды.

Бузулмакълыкъ чыкъгъанды
Адамны уллу жашындан,
Ол, уруп къанын тёгюп,
Бошады къардашындан.

Ёлтюргюнчю айтханды
Бу аны ёлтюрюрге,
Алай ол унамады
Анга къол кётюрюрге.

Айтхан эди: «Аллахдан
Къоркъама ёлтюрюрге, –
Туугъан къарындашыма
Къыйынлыкъ келтирирге».

Ёлтюрюлген жаш Хабил
Шейит болуп табылды.
Аны ёлтюрген Къабил,
Барып, отха табынды.

Юйюрю, харам ашап,
Бир бирлерин алдыла,
Кяфырлыкъны мурдорун
Жер юсюне салдыла.

Ата-ана! Харам ашау –
Буду баланы бузуу,
Ол ашагъан харамды,
Аны динсиз этген уу.

Аны ючюн этди Аллах
Харамланы харамла,
Аны ючюн этди Аллах
Адамланы адамла.