Тёртюнчюсю – ийнаныу
Аны расулларына,
Дин юйретирге ийген
Ийнаннган къулларына.

Аладан билиннгенле –
Ауал Адам, жашы Шис,
Дагъыда Нух, Ибрахим,
Салих, Исмайыл, Идирис.

Дагъыда Исхакъ, Якуб,
Сора Юсюф, сора Лут,
Дагъыда Муса, Харун,
Узейир, Шохайып, Худ.

Сора Дауут, Сулейман,
Сора Иса, Ахия,
Элияс, Алиясах,
Зулкифли, Зекерия.

Дагъыда Аюб, Жюнюс,
Зулкъарней, Хызыр да бар,
Сора – Локъман, Мухаммат –
Буду барындан хапар.

Юмметлени сыйлысы –
Бизбиз аны юммети.
Бизни аладан сыйлы этди
Аны тутхан сюннети.

Мухаммат араблыды,
Абдуллахны улуду.
Не бек сыйлы эсе да,
Ол да Аллахны къулуду.

Атасы Абдул-Муталип
Файгъамбаргъа аккады.
Файгъамбар туугъан жер а
Сыйлы болгъан Меккады.

Бизге аны табып берген –
Ёз анасы Аминат,
Сютю бла ёсдюрген –
Сют анасы Халиймат.

Ата-анасы ёлюп,
Расул ёксюзлей къалды.
Къарт атасы табылып,
Аны асыраргъа алды.

Ол да мычымай ёлюп,
Энтда ёксюзлюк жетди,
Андан сора Абуталип
Анга осуйлукъ этди.