Нарт улу батыр Ёрюзмек а, дейле,
Нарт Ёрюзмек а, дейле.

Нартланы башы да Ёрюзмек а, дейле да,
Нартланы башы да Ёрюзмек а, дейле да.

5 Ёрюзмек да къыйналып да ёсгенди, дейле,
Кёп къыйынлыкълагъа да тёзгенди, дейле.

Ёрюзмек атланып тебирегенди, дейле,
Мал-Хушту арагъа да кетгенди, дейле.

Ол ура, бере да кетгенди, дейди,
10 Бийик сыртлагъа да жетгенди, дейди,

Бийик сыртладан да, ой, къарады да,
Уллу ёзенде бир от жарыкъла кёргенди, дейди.

— Бараман да не этейм?
Бармайман да не этейим? — дейди, —

15 Барама да — кесим тас,
Бармайма да — бетим тас, — дейди.—

Онг жауурунумда къачым бар,
Быллай жерлеге, къоркъуп,
Бармай къалмазгъа да антым бар!

20 Ол ура, бере кетгенди, дейди,
Ол от жарыкълагъа да жетгенди, дейди,
Ол уллу ёзенде бир уллу тойну кёргенди, дейди.

— Ёрюзмек дегенинг а келмезед? — дейле, —
Ёрюзмек дегенинг а келеди! — дейле.

25 Къалын къашлары да, кёрпелей, дейди,
Ол бёрю тону да желпегей, дейди.

— Ерюзмекни атын а тагъыгъыз! — дейди.
— Ёрюзмекни атын а тагъайыкъ! — дейле.

— Мен кеси атымы да кесим тагъарма, — дейди, —
30 Сюйген къызчыгъымы да кесим табарма, — дейди.

Кеси атында кеси такъгъанды,
Жин патчахны къызын да кеси тапханды.

Бир уллу ёзенде да аны бла къалгъанды, дейди,
Да муну бла да бир ойнай-кюле кетгенди, дейди,

35 Алайда олтуруп а ашадыла, дейди,
Жыр да этип, жырладыла, дейди.
Андан голлугъа да барып тепседиле, дейди.

Ёрюзмек да андан сора баргъанды, дейди,
Атыны айылларын а къаты уа тартханды, дейди.

40 Секирип атына уа миннгенди, дейди,
Тойгъа бек къаршы уа келгенди, дейди.

Патчахны къызчыгъын а сермеп алып а, дейди,
Атына салып а, къачып кетгенди, дейди.

Атына да миндирип, нарт элине къутулгъанды,
45 Юйюне элтирге уялып, агъач ичинде дорбунда тургъанды.

Аны обур Сатанай сезгенди, дейди,
Акъ марал болуп, агъач ичине киргенди, дейди.

Аны ызындан Ёрюзмек, кёп къууп, арыйды, дейди,
Жукъусу келип, бутлары жюрюмей, апчыйды, дейди,
50 Къара агъачны ичинде, аууп, жукълайды, дейди.

Обур Сатанай а алайгъа арбасы бла келеди, дейди,
Сора, Ерюзмекни арбагъа салып, алып кетеди, дейди.