Беш джылымда - къоюнда,
Он джылымда - оюнда,
Джыйырманчы джылымда
Тийрелени тоюнда.

Джыйырма бешге келгенде
Чам, накъырда сёзлерим,
Отузгъа джууукълаша
Къама кибик кёзлерим.

Отуз бешден атладым,
Къаблан кибик кекелим.
Къыркъдан атлай били иди
Мындан ары этерим.

Эллиу джылда - эл сагъыш,
Алкъын шатык атламым.
Алтмыш джылда - джан сагъыш,
Мыдахыракъ къарамым.

Джетмиш джылда тёр къайгъы,
Тынчлыкъ излеб санларым.
Сексен джылда - кёр къайгъы,
Ашыкъдырыб заманым.

Токъусаннга киргенлей
Къуранаят ауузумда,
Тоба, шукур борч болуб,
Таш мынчагъым къолумда.

Джюзден атлай тебредим –
Сабийликге къайтханча,
Джашаб кетген ёмюрюм
Къысха таурух айтханча.

Дуния деген джилтинди,
Уф - дегенлей джукъланыр!..
Мени кибик бу джерге
Энтда ненча сукъланыр?..