Къайнамайды толу къазан юйюмде,
Отджагъада джарыкъ отум джанмайды.
Бу дунияда ёлюм деген тёреден,
Ачымайын бир адам да къалмайды.

Мёлек кибик айлана энг тауушсуз,
Юй джумушну эте эдинг чарпытмай.
Айтхан сёзюнг тынгылагьаннга джарашыу,
Этген ишинг бир адамны джарсытмай.

Ол дуния деген тёре бар эсе
Сыйратындан учуб ётген сен болгъун,
Мекер джандет деген тёре бар эсе
Хур къызлагъа нёгер болгъун, тенг болгъун!

Тёзюм деген санны джибча байлагъан,
Тёрт санымы къурушдуруб керилтмей.
Эй бу ёлюм алгъа мени элтге эд,
Артха къоюб былай ачы термилтмей.

Джангызлыгъым - шкогумда джангыз окъ,
Къайры атсам да келиб манга тиерик...
Къатхан джюрек - олду джанны сууутуб,
Кёб турмайын сени ызынгдан иерик.

Сен барлыкъда - эрке эдим сабийча,
Сен джокълукъда - эл джарсыгъан бир факъыр.
Сенсиз джашау суу шоркъада кёмюкча,
"Уф", - дегенлей, джукъланыргъа хаб хазыр.

Къайнамайды толу къазан юйюмде,
Отджагъада джарыкъ отум джанмайды
Бу дунияда ёлюм деген тёреден
Ачымайын бир адам да къалмайды.

1980 дж. Терезе