Тартама - кесмейди чалкъым,
Батханды - чыкъмайды халкъым,
Ига бла айтмайла атын,
Билмейме не болур артын.

Окъуйла законну шартын,
Бичелле халкъыма тар къын,
Айталла уял, тын, тартын...
Билмейме не болур артын.

Джюрегим болгъанды салкъын,
Бушуулума мени сартын,
Къууанч келирми бир джартын?
Билмейме не болур артын.

Тюшмейди кишени алкъын
Халкъымы джашын эм къартын,
Къаздым къайгъыны къат-къатын...
Билмейме не болур артын.

Сынайма хар кимни къартын,
Халкъымы халиси алтын,
Сакълайма Джамбулну къатын...
Билмейме не болур артын.

Сюймейме дунияны затын,
Дуния мал законнга сапын,
Мыдахды сабий, къыз, къатын...
Билмейме не болур артын.

Бушуугьа бёленнген элим,
Бош къалды ой туугъан джерим,
Саулукъда къазылды кёрюм...
Бир кёлтюрюлмейди кёлюм.

Джашлыкъда бюгюлген белим,
Хар кюнде тёгюлген терим
Мени нек унутду бу ёлюм?
Бир кёлтюрюлмейди кёлюм.

Тиши-башы ышармай келин,
Бичгенча эрине кебин,
Мыдахлыкъ бездириб эсин...
Бир кёлтюрюлмейди кёлюм.

Мутхузду, мыдахды кёгюм,
Бир шкок атымды чегим,
Чыкъмазгъа болгъанды бегим...
Бир кёлтюрюлмейди кёлюм.

Къууаныб ышармай эрин,
Законну бегинден бегин...
Джабышыб тутханды джелим...
Бир кёлтюрюлмейди кёлюм.

Табмайма муну бир эбин,
Къууанад душманым-джегим,
Сындырыб сызгъырад джелим...
Бир кёлтюрюлмейди кёлюм.

Сен, насыб, аллынга тебин,
Айтдырма халкъыма сёгюм,
Кес джолун зорлукъну, кёрюн,
Кёлтюрюлюр ючюн кёлюм.

Тартама кесмейди чалкъым,
Батханды, чыкъмайды халкъым,
Иги бла айтмайла атын,
Билмейме не болур артын.

1944 дж. Казахстан