Чагаланы аллы башланнганлы бери
Бёлмейин чага этеме,
Трудоденлерими бери бер, бригадир,
Энди мен эрге кетеме.

Алай кетерге боллукъ тюйюлдю
Къачда сабанланы ормайын.
Трудоденлеринги берлик тюйюлме
Атанга-ананга сормайын.

Атама-анама сормай, бригадир,
Къуру да ишге сюресе,
Берген планынгы эртде толтургъанма,
Битеу иш бойнума тюл эсе.

Сен бу ишлени къоймасанг, къызчыкъ,
Алгъынча ариу кёрмезме.
Барыб а сен къайры барлыкъса,
Санга ёгюз, арба бермезме.

Мени кибик тюз колхозникни
Аллах муратын берликди.
Агъач арбаны башынга ур, бригадир,
Легковой бла келликди.

Сени кибик тюз колхозница
Ишни былай атыб кетемиди?
Легковой бла, ах келир кибик
Районда къуллукъ этемиди?

Мени кибик тюз колхозница
Ишни былай атыб кетемиди?
Районда къуллукъ этген болмаса
Легковой бла элтмеймиди?

Къалгъан къызлагъа эштдиресе деб
Мен анга къоркъуб ёлеме.
Ант этдире эсенг, эрге тебресегиз
Теблеб кетсрик кёреме.

Керти айтаса, кетерге тебресек,
Къарарыкътюлбюзкишиге,
Сёзюнгю зыраф иймей, бригадир
Башха мадар таб ишинге.

Трудоденлерими бери бер, бригадир,
Сен учетчикни келтириб,
Орамтын озсанг ызынгдан къарарма,
Терезе джабыуну кёлтюрюб.

Мен учетчикге атлы ийгенме,
Джерсиз, джюгенсиз, айылсыз.
Былай къызыб къалай къалгъанса?
Бир сейирликмиди хайырсыз?

Бир ариу сёзле айтаса, бригадир,
Кетмезлик кибик эсимден
Къаллай болгъанын кесинг ангыла,
Кёлюнг чыгъарыкъды кесингден.

Мен учётчикни келтириб, къызчыкъ,
Трудоденлеринги береме,
Къатхан къауданнга от салгъан кибик,
Къабыныб къалгъан кёреме.

Кёкге мийик чыгъыб къарайла
Самолетла бла лётчикле.
Разы болугъуз, сау къалыгъыз,
Бригадирле бла учётчикле.