Октябрны джарыкъ тийген кюнюнден
Тау Къарачай толу эркинлик табханса.
Шох юйюрню — совет халкъны ичинде
Россиягъа гитче къарнаш болгъанса.

Окъуу чыгъыб сени ана тилингде,
Туугъан халкъынг кууанч джырла джырлайды.
Шахарынгда эмда узакъ элингде
Шыбыла кюч чыракъ болуб джашнайды.

Чайкъалалла дамлы ханслы джайлыкъла,
Кюйюзлеча, сыртларынга салыб нюр.
Тауларынгда кёбдю хазна, байлыкъла,
Туч, къоргъашын, кюмюш, багъыр, ташкёмюр.

Джай кюнледе джашнайдыла ёзенле,
Унутмазла сизни къараб кёргенле.
Бурма чакъгъан джашил бухар чегетле,
Татлыдыла сизде ёсген кёгетле.

Эртден бла кюнден тийген таякъла
Къар таулагъа алтын бояу салалла.
Сау Союздан сенге келген къонакъла
Курортунгда джашлыкъ, саулукъ табалла.

Хар бир ишге кире бюгюн алчылыкъ,
Тау чатлада ёсед ара малчылыкъ.
Тюзлерингде сюредиле ырджысыз,
Мешина бла сабанланы джаш эм къыз.

Халкъ бла бирге кенгеш оноу этиле,
Ленин айтхан осиятла толалла.
Бизни ёхтем алгъа ургъан ёмюрде
Бютеу халкъла тынчлыкъ ючю къобалла.