Орусбийлары тар Басханда джашайла,
Кереклилерине къызыл будай ашайла.
Баргъан эдик Тебердиде джашаргъа,
Аллах къоймады толу къыйыныбызны ашаргъа.
Джандетли болсун Сюйюнчланы батыр Бекмырза,
Атха минее, атны белин бюгеди,
Суугъа кирсе, суу чабакълай джюзеди.
Аркъан атса, атны бойнун юзеди,
Садакъ тартса, тиер джерин биледи,
Къаргъа-къузгъун тилин биледи
Къамчи урса, джерни джарыб киреди,
Экиге эки эди да бирге бир эди,
Тау элледе бир белгили бий эди.
Ауба бийче алай айтыб джылайды:
Гюрге кюнде джыламазгъа тоба этдим,
Кюн аллына байхамбарны оба этдим,
Бюгюн кюнде мен джыламасам ким джылар,
Мен чыдагъан къыйынлыкъгъа ким чыдар?
Бий Бекмырза бла Алхаз бийге бирге ауруу тийгенди,
Алгъы бурун Алхаз бийим ёлгенди.
Бий Бекмырза алай айтыб сорады:
— Анам, къайры кетди Алхаз бий? —деб
Ауба бийче анга алай джууаб береди:
— Алхаз бийим эл джуртуна ётгенд —деб,
Джылкъылада бир тайчыкъгъа аман джанлы тиши джетгенд — деб,
Джандетли болсунла Сюйюнчланы ариу келинле,
Джылай эдиле башларына ау салыб.
Сюйюнчлада сый сырала къалыб кетдиле,
Ичерге адам табылмай, башларына эчки джау салыб.
Джандетли болсунла Сюйюнчланы эки джаш,
Экисине бирден ауруу тийгенди,
Экиси да бирден джан берелле,
Ала амалтын тау элле уахтысыз ёлелле.
Эмина тюлдю элни къыргъан, ёлетди,
Акъыллы башланы шашхын, тели этди,
Аналаны балалагъа бёрю этди,
Ууакъ сабийлени джер бешиклеге бёлетди,
Кёрген кюнлерибизни тёлетди,
Къыра-къыра тау эллени сёл этди,
Ауба бийче гитче бийчеге кёл этди.