Биз чыкъгъан эдик тар Басхандан джер къарай,
Джюрюген эдик джалгъан дунияда кюн санай.
Чыгъа келдик, тар Басхандан юрюлюб.
Кирген эдик шам Тебердиге тизилиб.
Биз умут этдик уллу Тебердиде джашаргъа
Бизге буюрулмагъанды Мухуну будайындан ашаргъа.
Къан джаугъанды Мухуну башы чатлагъа,
Кимле минерле мекер тамгъалы атлагъа,
Бизни хапарыбызны, ой кимле барыб айтырла
Уллу Басханда уа ныгъыш сакълагъан къартлагъа?
Шейит ёлюклени джуумай салалла къабыргъа,
Эминадан къачханланы санайдыла гяургъа.
Келеметни къызы болур ариу Уба-бийче,
Ол ийнеклени саууб чегет тюзге къысдады.
— Ийнеклерим эртден чыкъдан келгинчи
Тоханабыз джылан джырмаз хане болду,
Эки илячиним дуниядан тас болду.
Орусбий улу джиглт Элмырза ёлдю эсе,
.Чайорланы Тау-Артына элтиб ким сатар,
Сюйген балам гитче Алхаз ёлдю эсе,
Алтынлыны сылаб-сыйпаб ким атар,
Сары садагъын кёкге айландырыб ким тутар?
Тебердиге кёпюр салдым да суу элтди.
Биягъы эмина шам Тебердини къуу этди.
Таулада болады эминаны джоллары,
Кёб дарий бермесенг, ёлюкню джуумайды.
Бизни афендини къоллары.
Мекер тамгъалы къынгырбоюн аджирле
Минилмей, джууулмай бош къалдыла,
Уллу Тебердини джылтыратхан
Джаш къатынла тул къалдыла.
Терек кесдим да, Тебердиде суу элтди!
Абаданла, шыйыхны аллыбызгъа салыб,
Къыбылагъа айланыб дуа этдик.
Мангырай къалды Азгек толу кёб къоюбуз,
Басханда этиле болур бизни
Уллу «къууанчыбыз —тоюбуз».
Хапарыбыз джюрюйдю шайтан бла, джин бла.
Сымайылны къатыны обур Джандетхан
Эминаны Басханнга къоймайды хыйны бла, джек бла.
Бизни бу хапарыбызны эштсе келир эди
Чёпеллеуню анасы Даулетхан булут бла, кёк бла.
Кеч чыгъады Гитче Къолну чолпаны,
Басханны тауларын кюсей ёлдю
Атабийни джигит туугъан Сопаны.
Джер къазады керки бла джоннганлай
Кулдоз улу джангыз Мирземек ёлгенлей
Гыды ичинде марал, кийик бош къалды.
Келинлерибиз эшикге чыгъаргъа уялыб,
Бетлерине къара джабыула тарталла,
Киши къалмаз эминадан ёлмейин,
Намыс деб бир кючлю зат чыкъгъанды да,
Джашларыбыз ёлелле къатынларын кёрмейин.
Тёгерекге къарайбыз да таула болмаса джукъ кёрмейбиз,
Тарыгъыргъа киши джокъду да, не этерге билмейбиз,
Эмина болмаса башха ауруудан ёлмейбиз.