Джашла:
Биз чалкъы чала турабыз, къызла,
Бармакълача тизилиб,
Ызыбыздан алай дженгил келигиз
Кёгюрчюнлеча сюзюлюб.

Къызла:
Джетиджыллыкъны беш джылны ичинде
Биз толтуругъа излейбиз.
Алай эриниб бизге кёрюнмегиз
Биз аллай джашланы сюймейбиз.

Джашла:
Сиз да эришигиз, биз да эриширбиз, къызла,
Сизден алгъа барыргъа,
Чалкъы чалыуда, гебен этиуде
Къызыл байракъны алыргъа.

Къызла:
Сиз къызыл байракъ алсагъыз, джашла,
Биз выставкагъа барырбыз,
Хар не ишде алгъа барыб,
Махтау къагъытла алырбыз.

Джашла:
Сиз выставкагъа барырсыз, къызла,
Биз грамотала алырбыз,
Коммунист бригада атыбызгъа аталыб,
Махтаулу болуб барырбыз.

Къызла:
Сиз Мамайгъа эришигиз, джашла,
Биз Гаганованы джетербиз,
Джетиджыллыкъны беш джылны ичинде
Ажымсыз толу этербиз.

Джашла:
Тау тюзледе, чегет ичледе,
Чалкъыларыбызны таплайбыз,
Къызларыбыз, келигиз деб
Аллыгъызны сакълайбыз.

Джашла, къызла, эгеч, къарнаш,
Коммунизмге барабыз.
Колхоз ишледе, совхоз тюзледе
Биз къууанчладан толабыз!