— Чалкъычыгъымы хазыр этгенме,
Чалкъы чалыргъа кетеме.
— Сенекчигими хазыр этгенме,
Дырын джыяргъа джетеме.

— Мен алгъаракъгъа кетиб барама,
Ой, анда чалкъы чалырма.
— Мен сенден артха къаллыкъ тюйюлме,
Мен да ызынгдан барырма.

— Бизни ызыбыздан ой чыгъарыкъды,
Мыдах этмейди элибиз.
— Биз дырын джыйыб джетсек ызыгъыздан,
Мыдах болмасын кёлюгюз.

— Биз бичен чалыб турлукъбуз, тейри,
Къызла ызыбыздан келгинчи,
Эй, эгешчигим, санга оздурмам
Мен да чалкъыда ёлгюнчю

— Сен чалкъы чалдынг, мен дырын джыйдым,
Энди бошадыкъ, кетейик.
— Огъай, эгешчигим, кетерик тюлбюз,
Ферманы ремонт этейик.

Малланы семиз этербиз, тоба,
Сютлерин кърал ичерча,
Биз ферманы битдириб кетейик,
Ой, малла келиб тюшерча.

Биз бичен алай ишлейик, къарнашым,
Биз аямайыкъ санланы.
Партия бизни ариу кёрлюкдю
Семиз чагъарсакъ малланы.

Сиз дырын джыйыб джетдиригиз,
Аллында бичен чаллыкъбыз,
Планны артыкъ толтурсакъ, эгечим,
Ой, выставкагъа барлыкъбыз.

Чалкъычы кесине алай базады,
Мен чалкъы чалыб озсам деб,
Дырынчы къызчыкъ алай айтады,
Мен чалкъычыны созсам деб.

Ой чалкъы чалыб аллында барады,
Чалкъычы кесине базады,
Да бизни Хамитден кёлюгюз къалмасын,
Къыйыныбызны джазады.

Мен чалкъычыны джетиб барама,
Кёзюуюн анга бермейин,
Учетчик болмаса да биз ишлейбиз
Бригадирни кёрмейин.

Чалкъычы джашчыкъ бираз арыгъанды,
Да ол аллында олтурад.
Да учетчикден кёлюгюз къалмасын,
Ол заданиени толтурад.