Минги тау бла Къазман тауну арасында
Келгендиле нарт улулары, уллу Тейрини къуллары,

Къыркъ да сууну боюнларында жашап,
Къыр кёгетлени, Апсатыны малларын ашап.

5 Кюнчыкъгъандан, кюнбатхандан жерлерин,
Нарт батырла сакълай элле эллерин,

Сырпынланы, садакъланы къолларында тутханлай,
Нарт эллени эмегенледен къоруулай.

Эмегенле Къыркъ сууланы башларын алдыла,
10 Нарт жерлери суусуз къуруп къалдыла.

Къыркъ да сууну нарт эллери къозгъалдыла, къопдула,
Ачыуланып, эмегенле бла уруш этерге чыкъдыла.

Нарт Дебет да кёрюк отла жандырды,
Темир алыргъа ол кёп ташла сындырды.

15 Ол нарт аскерни кереклисин билгенди,
Нарт аскерге сауутла этип бергенди.

Эмегенле къара орманладан чыкъгъан элле,
Нарт аскерге ала чапхан элле.

Нарт аскер да чыкъгъан эди алагъа,
20 Азыкъларын жыйып состар къалагъа.

Эмегенле тереклени сермей элле,
Чий кёзлери нарт аскерни кёрмей элле.

Тереклени тамырлары бла быргъай элле,
Жарланы оюп, сууланы, билямукъ кибик, булгъай элле.

25 Нарт аскерле, къара орманланы жырып,
Битдирдиле сылыкъ эмегенлени, къырып.

Къыркъ суулары эмегенсиз болдула,
Къузгъун-къаргъала аланы ёлюклерине къондула.

Эмегенле къурт тёбеле болдула,
30 Ма аладан саскыла, чибинле болдула,

Ол гадур эмегенледен ала туудула.
Эмегенле, чирип, ийис этдиле,

Нарт эллери ауруп, ёлюп башлалла,
Нартла, къачып, жерлеринден къопдула,

35 Кюнчыгъышха, кюнбатышха къачдыла,
Ол жанлада тенгизлеге акъдыла.

Къыркъ суулары, къуруп, хужу къалдыла,
Ол жерлени ассы халкъла алдыла.