Кюн жарыгъы тийди бизге,
Сёзюм барды мени сизге,
Ишибиз баргъанды тюзге,
Жарыкълыкъ келгенди кёзге.

Ариу болур тарух, жомакъ
Жыргъа салып, этсе такъмакъ,
Айтыргъа болады омакъ.
Алай болса къадалайыкъ,

Жашауну жыргъа салайыкъ.
Ёнюбюзню аямайыкъ,
Жырчылагъа баш болайыкъ.
Бизге батыр большевикле

Оноуну къолгъа алгъанда,
Ызы бла уллу халкъгъа
Тамам тенгликни салгъанда,
Оноуладан кенг этдиле

Бизге къанлы душманланы,
Къалдырмайын тохтатдыла
Халкъла ичинде урушланы.
Сора башладыла ишлеп

Кючлю къала къурулушла,
Ол къурулушладан бири –
Хауа жыргъан темир къушла.
Бу затлагъа къарап, кёрюп,

Назму этейик тирилип,
Уллу тойланы этейик,
Жашауну насыбын билип.
Узакъ барсын, кючлю болсун

Аны жюрютген амалы,
Жыргъа салынп айтылад
Бизни Бахсанстройну халы.
Оноуну бирге салдыла

Башдагъы сыйлы нёгерле.
Оноу бла жыйылдыла
Бизни совет инженерле.
Ала къарап жерге, суугъа,

Тергеу этип, ойладыла.
Кёп сууланы барысындан
Бахсан сууну сайладыла.
Бары бир оноулу болуп,

Ол ишни къолгъа алдыла,
Жюреклери ариу кёрюп,
Бахсан бойнунда салдыла.
Терк, Къобанны арасында

Хар тарда бар эди бир черек,
Барысыны арасындан
Сайланнганды Бахсан черек!
Андагъы ишле ишлетип,

Къалмайын битген заманда,
Бек уллу сейир, тамаша
Ишле кёрюннгенди анда.
Ойлап, акъыл жетишмеген,

Айтып къулакъ эшитмеген,
Эскерип кёлге тюшмеген,
Айтайым болумун аны,
Сейиирлигини жокъ саны,

Сен да къарап, алай таны,
Биз ишледик ол къаланы
Барып, кёрюп, тергеу этсенг,
Акъылны бурсанг ишине
Толу шагъатлыкъ береди
Совет властны кючюне.

Сансыз-санаусуз чархладан
Топ-толуду аны ичи,
Бир чархында барды аны
Сау алты минг атны кючю.

Аны берген жарыгъындан
Жарыйдыла элле, шахарла.
Энтда жарырыкъды къалмай
Бек терен тарлада журтла.

Насыплыды мени журтум,
Шорхулдай тау череклери,
Татымны тау жайлыкълары,
Субай нарат тереклери.

Насыплыла тау эллери,
Къууанчлыды жюреклери.
Энди мында табылады
Хар излеген кереклери.

Акъсакъ Кязим алгъышлайды
Жангы жашауну тюз сырын.
Бютюн ариу сёзле бла
Жырлайыкъ насыплыкъ жырын.

1939