Алтакъ, кёзбау – бек кёп тюрлю,
Кими – сылхыр, кими – жинли;
Ким болур эки тилли,
Бири – жахил, бири – кирли.

Аллайланы иши – къайгъы,
Билигиз сиз дайым аны!
Алданмагъыз болса жарыкъ,
Этип къояр сизни жазыкъ.

Кёп слешип, тажатырла,
Чалпытып, таш чайнатырла.
Олжан, сибирь сынатырла,
Аналаны жилятырла.

Ташалада – бек батырла,
Жумдурукъла ойнатырла!
Кюнде исси къапдырырла,
Элни бирге чапдырырла!

Бирсилери – жасанырла,
Жырларынгы терк алырла,
Ие болуп да къалырла,
Уялмайын, махтанырла.

Нёгер болсанг – уялтырла,
Урмай, тюймей жилятырла.
Ууда итге талатырла,
Элде энишге къаратырла.

Тойда тоюп керириле,
Кёзлеу суугъа тюкюрюле.
Ёз къошларына юрюрле,
Аталарына кюлюрле.

Эки тилли алтакъланы,
Таша жерде жаншакъланы,
Сёз этерге бек сакъланы,-
Билимни жаш, иги таны!

1937