Халкъгъа салмай бугъоу, кишен,
Намысларын тута билген,
Терени жаулап, тюзге бургъан, -
Аллай бийле керек бизге.

Халкъны онгар жолун излеп,
Алгъа къарап, жолгъа тизген,
Эл жумушун туура сюзген, -
Аллай бийле керек бизге.

Халкъны тизип халал ишге,
Сакъ болуп юмметибизге,
Нюр келтирген бетибизге, -
Аллай бийле керек бизге!

Дуниялыкъгъа хыйсап этген,
Гюнах этмей, сууап этген,
Жалчы жекмей ёлюп кетген, -
Аллай бийле керек бизге.

Къул, ёзден деп айырмагъан,
Мадар излеп, тюз къарагъан,
Орун берген игибизге,-
Аллай бийле керек бизге!

Къаты тутхан динибизни,
Шатык билген тилибизни,
Саз этмеген кюнюбюзню,-
Аллай бийле керек бизге!

1900