1.
Ёхтемлигим сюеле эд къаяча,
Истем болмай анга джелле, неуа къар,..
Бюгюн ол да бюгюлгенди джаяча,
Садакъ атар, не белинден чорт сынар.

Садакъ атса, джара салыр аямай
Тинлернне бу юч джакъсыз баланы,
Джаралагъа заман чыртда джарамай,
Ол бекден-бек инджилтирми аланы?

Олтурама болумуму билялмай...
Чынг аллында атлагъанмем терсине?
Ахыр кючюн салыб турад сыналмай
Ёхтемлигим, ол сынса уа, джашау не...

2.
Ий, мен неле сандырайма ичимден?!
Не ёхтемлик, не учузлукъ дейме мен?
Сенсиз джашау эталыргъа кючюмден
Келмезлигин бек билесе, ариу, сен!

Олду сени эрке этген кёзюуде,
Бир бош сёзден «кетеме!» — деб тебретген,
Джылыу бола тургъанлайна кёзюнгде,
Сёзлеринг бла джюрегими терлетген.

Сени ариу бетинг толгъан нюр айды!
Булут джокъду! Болду, кирме тереннге!..
Меннге тыйгъыч салгъан чегинг ушайды
Айны тёгерегиндеги кюреннге.

3.
Кемсиз ариу айт! — дейсе да сен меннге,
Да айтайым, джюрегинге джарайым,
Ариу айтхан кибик джансыз гинджиге,
Бир айт, джаным, сеннге къалай къарайым?

Кетеме — деб, кетеме — деб эртдеден,
Джаным саудан этиб турма мени сал!
Кетмей боллукъ тюл эсенг а сен менден,
Кетеме деб айтмагъанлай, кет да къал!

Мен кёрмейин къалгъан болсам ёлюгюн,
Ийнанмайма ёлгенине танышым,
Ма аллайын, къайтырыкъса, — деб, — бир кюн,
Бек ышаныб сакъларыкъды сагъышым.

4.
Кёб сёлещдим! Европачы тюлме мен,
Бир къызтеке сёзле айта турургъа!
Мундан ары бек ачыуландырсанг сен,
Мен боллукъма къулагъынгы бурургъа!

Бургъан кибик устаз камсык сохтаны.
Кёзюм къыймайд хыныракъчыкъ этерге,
Сен сабийсе, хар заманда бил аны!
Акъыл джыймай, умут этме кетерге!

Сатанайдан кем тюл эсе да мыйынг,
Джокъ эсе да халкъда сенден бир такъыл,
Тэтчер кибик болгъан кюнде да сыйынг,
Мен ёлген кюн джыярыкъса сен акъыл!

1991 дж.